بارہ بنکی (ابوشحمہ انصاری)بلاک سرولی غوثپور کے خردمئو میں آج ایک اہم سیاسی و سماجی ملاقات اس وقت دیکھنے کو ملی جب بارہ بنکی کے رکنِ پارلیمان تنوج پُنیا نے کانگریس سوشیل میڈیا بلاک سرولی غوثپور کے سکریٹری محمد اویس انصاری کی رہائش گاہ پر خصوصی آمد کی۔ اس پُروقار نشست میں علاقائی ترقی، عوامی فلاح و بہبود اور تنظیمی امور پر تفصیلی تبادلۂ خیال ہوا۔
اس موقع پر کئی اہم شخصیات بھی موجود تھیں، جن میں بلاک پرمُکھ رینو ورما، ضلع سوشیل میڈیا صدر محمد ذیشان، بلاک صدر امِت کمار تریویدی، ضلع جنرل سیکریٹری سوشیل میڈیا عون میاں، بزرگ کانگریسی رہنما بیچن لال دیکشت، شیو کمار ورما، محمد عرفان، مرلی راوت، سُدھانشو ورما، بی ڈی سی پرمود کمار(ننھا راوت )اور دیگر معزز کارکنان شامل تھے۔
نشست کے دوران علاقے میں بجلی کی فراہمی کا دیرینہ مسئلہ زیرِ بحث آیا، خصوصاً کمزور 25 کے وی اے ٹرانسفارمر کی جگہ 100 کے وی اے ٹرانسفارمر کی فوری تنصیب کا اعلان کیا گیا۔ اس فیصلے پر مقامی عوام نے خوشی کا اظہار کرتے ہوئے تنوج پُنیا کا شکریہ ادا کیا۔
چائے کی سادہ مگر پُرخلوص نشست میں سیاسی نظریات، تنظیمی یکجہتی اور ترقیاتی منصوبوں پر سنجیدہ گفتگو ہوئی۔ تنوج پُنیا نے محمد اویس انصاری کی عوامی خدمات کو سراہتے ہوئے کہا اویس انصاری جیسے کارکن پارٹی کی بنیاد کو مضبوط بناتے ہیں، ان کی محنت اور عوامی وابستگی قابلِ ستائش ہے۔
اس موقع پر اویس انصاری نے بھی کہا میرے غریب خانے پر ایم پی صاحب کی آمد میرے لیے باعثِ فخر ہے۔ یہ ملاقات عوامی مسائل کے حل اور تنظیمی استحکام کی سمت ایک مثبت قدم ہے۔
یہ ملاقات نہ صرف تنظیمی ہم آہنگی کی مظہر بنی بلکہ یہ ثابت کیا کہ کانگریس پارٹی زمینی سطح پر عوام کے ساتھ مضبوط تعلق رکھتی ہے۔
یہ نشست عوامی خدمت، اتحاد، اور علاقائی ترقی کی ایک مثال کے طور پر طویل عرصے تک یاد رکھی جائے گی۔
