فخرالدین علی احمد پوسٹ گریجویٹ ڈگری کالج،میں سالانہ جلسۂ تقسیمِ انعامات کا شاندار انعقاد
بارہ بنکی (ابوشحمہ انصاری) فخرالدین علی احمد پوسٹ گریجویٹ ڈگری کالج، محمودآباد میں 48واں سالانہ جلسۂ تقسیمِ انعامات و جشنِ تعلیمی شایانِ شان انداز میں منعقد ہوا، جس میں ریاستِ اترپردیش کے سابق کارگزار وزیر اعلیٰ ڈاکٹر عمار رضوی نے بحیثیت مہمانِ خصوصی شرکت کی۔ تقریب کو خطاب کرتے ہوئے انہوں نے کہا کہ کردارساز تعلیم ہی روشن مستقبل کی ضمانت ہے۔
تقریب کا آغاز مجسمے پر گلپوشی اور چراغ روشن کرنے سے ہوا۔ کالج کی پرنسپل پروفیسر ڈاکٹر سیما سنگھ نے استقبالیہ خطاب میں ادارے کی تعلیمی، نصابی، اور سماجی خدمات کا احاطہ کیا۔
ڈاکٹر عمار رضوی نے اپنے بصیرت افروز خطاب میں کہا کہ تعلیم کا مقصد صرف معلومات کا حصول نہیں بلکہ ایک باشعور اور باکردار انسان کی تعمیر ہے۔ انہوں نے کہا کہ استاد کا کردار روحانی باپ جیسا ہوتا ہے، جو طالب علم کو نہ صرف علم دیتا ہے بلکہ اس کی شخصیت کو بھی سنوارتا ہے۔ انہوں نے نوجوانوں میں جوش کے ساتھ ہوش اور شعور کی اہمیت پر زور دیتے ہوئے کہا کہ تربیت یافتہ نسل ہی ملک کا روشن مستقبل ہے۔ انہوں نے کردارساز تعلیم پر زور دینے کی وکالت کی۔
کالج کے طلباء و طالبات نے ثقافتی پروگرام پیش کیے۔ کالج پہنچنے پر مہمان خصوصی ڈاکٹر عمار رضوی کا کالج کے این سی سی، این ایس ایس، روورز و رینجرز اسٹوڈنٹس نے پُرجوش استقبال کیا۔ بیٹی بچاؤ، بیٹی پڑھاؤ جیسے اہم موضوعات پر ڈرامے اور سنگیت پیش کیے گئے۔ پروگرام کی نظامت ڈاکٹر منتظر قائمی نے کی، اور ڈاکٹر نیرج کمار نے کالج کی سالانہ رپورٹ پیش کی۔
اس موقع پر کالج کے ٹاپرز، یو جی سی نیٹ اور جے آر ایف کامیابین، این سی سی و روورز-رینجرز کیڈیٹس، ثقافتی و کھیلوں کے مقابلوں میں نمایاں طلبہ و طالبات، سڑک تحفظ بیداری مہم اور قومی خدمت اسکیم میں بہترین کارکردگی پیش کرنے والوں کو انعامات اور توصیفی اسناد سے نوازا گیا۔
پروگرام کے اختتام پر پروفیسر سرویش کمار مشرا نے مہمانانِ گرامی، اساتذۂ کرام، طلبہ و طالبات اور صحافیوں کا شکریہ ادا کیا۔
اس موقع پر پروفیسر محمد سعید، ڈاکٹر داود احمد، پروفیسر سرویش کمار مشرا، ڈاکٹر زبیا خان، ڈاکٹر ونیتا پانڈے، ڈاکٹر دیپ شکھا، پروفیسر جیوتی شاہ، ڈاکٹر ثنا پروین انصاری کے علاوہ بہت سے لوگ موجود رہے
