کل ہند اسلامک علمی اکیڈمی کانپور کااعلان، تخصصات کے طلباء و باصلاحیت اساتذہ کیلئے نشستیں مخصوص
کانپور (محمد عثمان قریشی) موجودہ دور میں اسلامی شریعت کو فکری، قانونی، تہذیبی اور تعلیمی سطح پر جن سنجیدہ چیلنجز کا سامنا ہے، وہ ملت اسلامیہ کے لیے ایک زبردست آزمائش بن چکے ہیں۔ عقائد، شعائر اور دینی قوانین پر براہ راست اعتراضات کیے جا رہے ہیں، اور نئی نسل کو ارتداد، الحاد، سیکولرزم اور تشکیک کے دلدل میں دھکیلا جا رہا ہے۔ ان حالات میں دینی مدارس کے فضلاء پر بڑی ذمہ داری عائد ہوتی ہے کہ وہ ان فتنوں کا علمی، فکری اور قانونی طور پر مقابلہ کریں۔اسی پس منظر میں اسلامک فقہ اکیڈمی (انڈیا) کی سرپرستی میں کل ہند اسلامک علمی اکیڈمی اور حق ایجوکیشن اینڈ ریسرچ فاؤنڈیشن کانپور کے زیر اہتمام، ایک اہم تین روزہ قومی ورکشاپ بعنوان:”موجودہ دور میں اسلامی شریعت کا دفاع: منہج اور طریقہئ کار“ مورخہ 30 مئی تا 1/ جون 2025ء (جمعہ، سنیچر، اتوار)، حق ایجوکیشن اینڈ ریسرچ فاؤنڈیشن، جمعیۃ بلڈنگ رجبی روڈ کانپور میں منعقد ہونے جا رہا ہے، جس میں ملک کے مختلف صوبوں سے منتخب فضلائے مدارس، محققین، مدرسین، اور فکری و علمی شعبہ سے وابستہ افراد کی شرکت متوقع ہے۔
کل ہند اسلام علمی اکیڈمی کانپور کے ذمہ داران، صدر مفتی اقبال احمد قاسمی، نائب صدر مفتی عبدالرشید قاسمی، جنرل سکریٹری مولانا خلیل احمد مظاہری اور حق ایجوکیشن کے ڈائریکٹر مولانا امین الحق عبداللہ قاسمی نے مشترکہ طور پر بتلایا کہ ورکشاپ میں ایسے اہم موضوعات پر گفتگو ہوگی جو عصر حاضر کے فتنوں، قانونی دباؤ، فکری ارتداد، یکساں سول کوڈ، اور شعائر اسلام پر اعتراضات جیسے نازک معاملات سے متعلق ہیں۔ ساتھ ہی شریعت اسلامی کے دفاع، دعوتی منہج، جدید ذرائع ابلاغ کے استعمال، اور نوجوان نسل کی ذہن سازی جیسے عملی پہلوؤں پر بھی رہنمائی فراہم کی جائے گی۔انہوں نے بتلایا کہ اس ورکشاپ میں ملکی سطح کے کئی ممتاز علماء، مفکرین اور ماہرین قانون و دعوت ورکشاپ سے خطاب کریں گے۔
سہ روزہ ورکشاپ کے منتظم مولانا امین الحق عبداللہ قاسمی نے کانپور و اطراف کے مدارس کے ذمہ داران سے درخواست کی کہ اس ورکشاپ میں شرکت دعوت نامہ اور پیشگی رجسٹریشن کی بنیاد پر محدود نشستوں تک ممکن ہے۔لہٰذا دینی اداروں، مدارس، اور علمی شخصیات سے گزارش ہے کہ وہ اپنے ہاں کے باصلاحیت، فکری طور پر سنجیدہ اور عصری تقاضوں سے واقف فضلاء کو اس میں شرکت کے لیے نامزد فرمائیں۔رجسٹریشن کی آخری تاریخ28 مئی 2025ء بروز بدھ ہے۔ رجسٹریشن کیلئے 9839125171 اور9696314272پر رابطہ کیا جاسکتا ہے۔
