بزمِ اردو ادب لکھنؤ کے تحت 35 کوچنگ سینٹروں کے امتحانات کامیابی کے ساتھ اختتام پذیر
لکھنؤ (ابوشحمہ انصاری) بزمِ اردو ادب، لکھنؤ کے زیرِ اہتمام ملک بھر میں قائم 35 اردو کوچنگ سینٹروں کے ماہانہ امتحانات نہایت کامیابی اور خوش اسلوبی کے ساتھ اختتام پذیر ہوئے۔
بزم کے چیئرمین سہیل ساحل نے بتایا کہ اردو زبان کے فروغ، اس کی بقا اور نئی نسل میں دلچسپی پیدا کرنے کے مقصد سے بزمِ اردو ادب نے مختلف شہروں میں اردو کوچنگ سینٹروں کا جال بچھایا ہے، جہاں طلبہ کو اردو پڑھنے، لکھنے اور بولنے کی باقاعدہ تربیت فراہم کی جاتی ہے۔
انہوں نے مزید کہا کہ یہ امتحانات یکم نومبر سے 5 نومبر 2025 تک منعقد کیے گئے، جن میں ملک کے مختلف حصوں سے ہزاروں طلبہ نے بھرپور حصہ لیا۔ بزم کی جانب سے پورے امتحانی عمل کو نہایت ایمانداری، شفافیت اور اصول و ضوابط کے مطابق انجام دیا گیا۔
آگرہ میں قائم عائشہ اردو کوچنگ سینٹر، جو ڈاکٹر سعدیہ سلیم شمسی کی نگرانی میں کامیابی کے ساتھ چل رہا ہے، اپنی تعلیمی و تربیتی خدمات کے لیے نمایاں رہا۔ اس سینٹر میں اردو کی تعلیم کے ساتھ ساتھ پرسنلٹی ڈیولپمنٹ کی خصوصی کلاسیں بھی منعقد کی جاتی ہیں، جو طلبہ کی ذہنی و اخلاقی تربیت میں انتہائی مفید ثابت ہو رہی ہیں۔
رامپور کے نیم کی زیارت علاقے میں واقع گلستانِ اردو کوچنگ سینٹر ( یمن کی سرپرستی میں) اور صبا اردو کوچنگ سینٹر بھی اردو کے چراغ کو روشن رکھنے میں سرگرم ہیں۔ اسی طرح الیقین سینٹر، ذکی اردو کوچنگ سینٹر، الفلاح اردو کوچنگ سینٹر سمیت دیگر مراکز بھی اپنی بہترین کارکردگی سے طلبہ میں اردو کے تئیں شوق و محبت کو فروغ دے رہے ہیں۔
اس کے علاوہ چمن اردو سینٹر، زین اردو سینٹر، مریم اردو سینٹر اور دیگر مراکز نے بھی امتحانات میں بھرپور حصہ لیا اور بزم کے مشن علم کی روشنی سب کے لیے کو عملی جامہ پہنایا۔
اختتام پر سہیل ساحل نے کہا کہ اردو محض زبان نہیں بلکہ ہماری تہذیب، شناخت اور احساسِ وابستگی کی علامت ہے۔ بزمِ اردو ادب اردو کے احیا اور استحکام کے لیے اپنی کوششیں مسلسل جاری رکھے گا۔
