تعلیم اور ماحولیات ہی قوم کی اصل طاقت ہیں: ڈاکٹر عمار رضوی
بارہ بنکی (ابوشحمہ انصاری) وزیرِاعظم نریندر مودی کا یومِ پیدائش محمود آباد کے مولانا آزاد انسٹی ٹیوٹ آف ہیومینیٹیز، سائنس اور ٹیکنالوجی میں نہایت شاندار اور پُررونق انداز میں منایا گیا۔ پورے کالج کا ماحول جشن کا منظر پیش کر رہا تھا۔ طلبہ و طالبات اور اساتذہ نے وزیرِاعظم کو مبارک باد دی اور پرجوش تالیوں سے فضاء گونج اُٹھی۔
تقریب کا آغاز اتر پردیش کے سابق کارگزار وزیرِاعلیٰ ڈاکٹر عمار رضوی نے شجرکاری کے ذریعے کیا۔ انہوں نے کہا کہ "صاف اور سبز بھارت” وزیرِاعظم مودی کا خواب ہے اور ہم سب کو اس خواب کو حقیقت بنانے کے لیے بھرپور کوشش کرنی چاہیے۔ شجرکاری کے ذریعے انہوں نے ماحول کے تحفظ کا پیغام بھی دیا۔
تقریب کا نمایاں پہلو کیک کاٹنا رہا۔ طلبہ نے جوش و خروش کے ساتھ وزیرِاعظم کا یومِ پیدائش منایا اور ایک دوسرے کو مٹھائی کھلا کر خوشی کا اظہار کیا۔ اس موقع پر کالج کی ایک ہونہار طالبہ کو اعزاز سے نوازا گیا۔ اُسے گلدستہ، شال، تمغہ، توصیفی سند اور دیدہ زیب شیلڈ پیش کی گئی۔ اعزاز ملنے پر طالبہ جذبات سے لبریز ہوگئی اور اساتذہ و ادارے کا شکریہ ادا کیا۔
اس شاندار تقریب میں ادارے کے اساتذہ، ادیب، شاعر، صحافی، مقامی نمائندے، سماجی کارکن اور طلبہ و طالبات بڑی تعداد میں شریک ہوئے۔
اپنے خطاب میں ڈاکٹر عمار رضوی نے کہا کہ وزیرِاعظم نریندر مودی نے ہندوستان کو عالمی سطح پر نئی شناخت دی ہے۔ ان کی قیادت میں ملک کا وقار بلند ہوا ہے اور ہندوستان کی عظمت دنیا کے نقشے پر مزید نمایاں ہوئی ہے۔ انہوں نے کہا کہ مودی کی زندگی جدوجہد اور ایثار سے عبارت ہے۔ آج کی نوجوان نسل کو چاہیے کہ وہ تعلیم، خدمت اور ماحول کے تحفظ کے ذریعے قوم کی تعمیر میں اپنا حصہ ڈالے۔ تعلیم اور ماحولیات ہی قوم کی اصل طاقت ہیں اور نریندر مودی ان قدروں کے نمائندہ ہیں۔
یہ امر بھی قابلِ ذکر ہے کہ ڈاکٹر عمار رضوی نہ صرف علمی و تعلیمی دنیا کے درخشاں چراغ ہیں بلکہ سیاست اور سماج میں بھی ان کی خدمات نمایاں ہیں۔ ان کی بصیرت، قیادت کی صلاحیت اور سماجی مسائل کے تئیں سنجیدگی نے انہیں نوجوانوں اور عوام کے درمیان ایک مثالی شخصیت بنا دیا ہے۔
اختتام پر یہ تقریب اپنی شاندار کامیابی اور عوامی شرکت کے باعث یادگار ثابت ہوئی، جہاں سینکڑوں افراد کی موجودگی نے اسے اور بھی باوقار بنا دیا۔
