براؤں شریف سدھارتھ نگر: عرس شعیب الاولیاء کے باوقار موقع پر دعوتِ اسلامی انڈیا کی مجلسِ رابطۃ بالعلما و المشائخ و مزاراتِ اولیا ہند کے زیرِ سرپرستی ایک باوقار و پُراثر تعارفی پروگرام کا انعقاد عمل میں آیا، جس میں علم و عرفان کے سچے متلاشیوں، اولیاء کرام کے دیوانوں، اور سنّتوں کے شیدائیوں کی بھرپور شرکت نے اس روحانی محفل کو تابناک بنا دیا۔
تعارفی مکتب اور اصلاحی کتب کا تعارف
دعوتِ اسلامی کے تحت ایک تعارفی مکتب کا اہتمام کیا گیا، جس میں علمائے اہلِ سنّت اور مشائخِ کرام کے لیے درسی و اصلاحی کتب کا دلنشین تعارف پیش کیا گیا۔ اس موقع پر دعوتِ اسلامی کی جانب سے دینی تعلیم، فروغِ سنّت اور اصلاحِ معاشرہ کے میدان میں انجام دیے جانے والے کاموں کو بھی اجاگر کیا گیا، جسے حاضرین نے نہایت قدر کی نگاہ سے دیکھا۔
غریب نواز ریلیف فاؤنڈیشن کا جذبۂ خدمت
اس پُرنور اجتماع میں غریب نواز ریلیف فاؤنڈیشن کی جانب سے شربت و طعام کا اہتمام کیا گیا، جو خدمتِ خلق کی درخشاں مثال تھی۔ فاؤنڈیشن کی خدمات نے زائرین کے دل جیت لیے اور روحانی فضا میں مٹھاس گھول دی۔
اصلاحی رسائل و کتب کی وسیع تقسیم
عوام الناس میں تقریباً 500 سے زائد اصلاحی رسائل تقسیم کیے گئے جن میں:
- فیضانِ نماز
- میت کو غسل دینے کا طریقہ
- وضو اور غسل کا طریقہ
- کپڑا پاک کرنے کا طریقہ
- بادشاہ شاہ کی ہڈیاں
اور دیگر دینی کتب شامل تھیں۔ یہ رسائل نہ صرف معلوماتی تھے بلکہ عوامی اصلاح و تربیت کا مؤثر ذریعہ بھی ثابت ہوئے۔
علمائے کرام سے ملاقاتیں
دارالعلوم اہلِ سنت فیض الرسول کے جید اساتذہ کرام اور دیگر مقامی علما سے دعوتِ اسلامی کے وفد نے ملاقات کی۔ اس موقع پر فاضل فیض الرسول نیوز جی 24 کے بانی اور کارگزار ایڈیٹر شفیق فیضی نے بھی شرکت کی۔ انہوں نے دعوت اسلامی کے پیش قدمی اور گرانقدر خدمات کو دوسرے ملی اور مذہبی تنظیموں کے لئے قابل تقلید بتایا۔ پروگرام میں دعوت اسلامی کی طرف سے کئے جارہے تنظیمی، فلاحی اور تعلیمی کا مفصل تعارف پیش کیا۔ اس تعارفی نشست میں اصلاحی مقاصد، دینی خدمات اور امتِ مسلمہ کی فلاح کے لیے دعوتِ اسلامی کے عالمگیر مشن پر روشنی ڈالی گئی۔
مزار شریف پر روحانی حاضری
روحانی فیوض و برکات سے لبریز اس محفل کا اختتام مزار شریف پر حاضری سے ہوا، جہاں علما و مشائخ نے ایصالِ ثواب کی دعائیں کیں اور امت کے حق میں خیر و برکت کی التجائیں کیں۔
شرکاء کی فہرست
عرس شعیب الاولیاء کے بافیض پروگرام میں دعوتِ اسلامی کی اہم شخصیات نے شرکت فرمائی:
- حضرت مولانا حافظ و قاری صلاح الدین صاحب قبلہ، نگرانِ مجلس رابطۃ بالعلما و المشائخ و مزاراتِ اولیا (کل ہند سطح پر ذمہ دار)
- مولانا اعجاز الحق مدنی ، رکنِ ریجن (کشمیر تا بہار)
- مولانا ذیشان مدنی ، ڈویژن نگران (بستی)
- مولانا تاج محمد ، ضلعی نگران (سنت کبیر نگر)
- مسیح الدین عطاری، شعبہ عشر اطرافِ گاؤں، رکنِ ڈویژن
ان علمائے کرام کی شرکت نے محفل کو علمی، روحانی اور تنظیمی لحاظ سے بھرپور جِلا بخشی۔
