کانپور : آل انڈیا غریب نواز کونسل کے ایک وفد نے حضرت علامہ مولانا محمد ھاشم صاحب قبلہ اشرفی قومی صدر آل انڈیا غریب نواز کونسل کی قیادت میں بذریعہ پولس کمشنر کانپور کو محضر نامہ پیش کیا اور ہندوستان کے وزیر اعظم جناب نریندر مودی صاحب اور صدر جمہوریہ محترمہ دروپدی مرمو صاحبہ سے یہ مانگ کی کہ عرس غریب نواز اجمیر شریف (6 رجب المرجب)کے موقع پر سرکاری چھٹی کا اعلان کرے
ںشہنشاہ ہندوستان حضرت خواجہ غریب نواز نے کسی ملک یا ریاست پر حکومت نہیں کی بلکہ انسانیت،اتحاد،ہمدردی اور مساوات کے پیغام کو نہ صرف ہندوستان میں بلکہ دنیا کے دوسرے ملکوں میں بھی پہونچایا اسی لئے سبھی مذہب کے لوگ آپ کے دربار میں حاضری دیتے ہیں لہٰذا ایسے عظیم المرتبت صوفی کے عرس کے موقع پر آل انڈیا غریب نواز کونسل،و علماءکرام ،و ائمہ مساجد و دانشوران قوم پر زور اپیل کرتے ہیں کہ6 رجب عرس غریب نوازکے موقع پر چھٹی کو یقینی بنائیں۔
اس موقع پر کونسل کے قومی صدر نے کہا آج ملک جل رہا ہے ،نفرت و تعصب کا بازار گرم ہے جس کی وجہ سے بد امنی کا ماحول ہے واضح ہو کہ یہ ہمارا پیارا ملک ہے جہاں خواجہ غریب نواز نے انسانیت مانوتا بھائی چارے کا درس دے کر ظلم اور نفرتوں کو مٹایا تھا انسان کو انسان سے محبت کرنا سکھایا تھا ،
آج غریب نواز کے پیغام محبت کو عام کرکے نفرتوں کو مٹایا جا سکتا ہے اسی لئے آل انڈیا غریب نواز کونسل ہر سال خواجہ غریب نواز علیہ الرحمہ کے عرس کے موقع پر غریب نواز ہفتہ کا اہتمام کرتی ہے تاکہ غریب نواز کی تعلیم محبت آنے والی نئی نسلوں تک پہنچتی رہے خواجہ غریب نواز کا خاص پیغام یہ ہے کہ چھوٹے بڑوں کی عزت کریں اور بڑے چھوٹوں پر شفقت کریں ،بھید بھاﺅ ،ذات پات ختم ہو، گورے کالے ،امیر غریب سب عزت کے حقدار ہیں
محضر نامہ پیش کرنے والوں میں مولانا محمد ہاشم اشرفی ، مولانا مہتاب عالم قادری مصباحی،ہاشم علی رضوی،حافظ منھاج الدین قادری ،حافظ عبد الرحیم بہرائچی ،واصف علی اشرفی،فخر الدین بابو ،سمیع قریشی،مسران معبود،شاہ عالم،حافظ محمد ارشد اشرفی ،ماسٹر اقبال احمد نوری،محمد ادریس خان وغیرہ موجود تھے
