لکھنٶ(ابوشحمہ انصاری) دہلی یونیورسٹی کے ستیہ وتی کالج کے شعبۂ اردو میں ادبی و تعلیمی سرگرمیوں کے لیے موجود ’’بزمِ ا دب‘‘کے زیرِ اہتمام نو وارد طلبہ و طالبات کے اعزاز میں ایک پرمسرت استقبالیہ تقریب کا انعقاد کیا گیا۔تقریب کا آغاز تلاوتِ کلامِ پاک سے ہوا،اس کے بعد نعتِ رسولِ مقبول ﷺ پیش کی گئی۔ نظامت کے فرائض بزم ادب کے سرگرم رکن عالیہ ناز نے نہایت خوش اسلوبی سے انجام دیے۔
اس موقع پر استقبالیہ کلمات پیش کرتے ہوئے ڈاکٹر محمد رکن الدین نے اپنے خطاب میں کہا کہ ’’اردو زبان محض رابطے کا وسیلہ نہیں بلکہ یہ ایک تہذیب، روایت اور جمالیاتی حس کی نمائندہ زبان ہے۔ نئے طلبہ اردو کے فروغ میں اپنی تخلیقی صلاحیتوں کو بروئے کار لائیں۔‘‘ڈاکٹر فیاض عالم نے اظہار خیال کرتے ہوئے نو وارد طلبا و طالبات کے لیے کالج میں موجود سہولیات سے روشناس کرایا اور کہا کہ کلاس کے ساتھ دیگر شعبوں سے بھی فائدہ اٹھائیں تاکہ مستقبل میں آپ سب کے لیے مواقع کی کمی کا احساس نہ ہو۔
ڈاکٹر بشیر شاہین نے اپنے خطاب میں نووارد کو خوش آمدید کہتے ہوئے نیک خواہشات کا اظہار کیا اور کہا کہ ستیہ وتی کالج میں شعبۂ اردو بہت متحرک و فعال شعبہ ہے، لہذا اس کالج میں موجود سہولیات سے استفادہ کریں۔ اس کالج میں متعدد سوسائٹیز ہیں جہاں طلبا و طالبات کو ہر میدان کی تربیت دی جاتی ہے۔ آپ سب ان سوسائٹیز میں بڑھ چڑھ کر حصہ لیں ۔ ڈاکٹر عارف اشتیاق نےبزم ادب اور کالج کے نظم و ضبط پر تفصیلی گفتگو کرتے ہوئے بچوں کو خوش آمدید کہا۔
پروگرام کے دوران طلبہ نے متنوع ادبی سرگرمیوں مثلاًغزل سرائی،بیت بازی اور دیگر تخلیقی سرگرمیوں کے ذریعے سامعین سے خوب داد حاصل کی۔ سینئر طلبہ نے نئے ساتھیوں کا خیر مقدم کرتے ہوئے اپنے تجربات اور شعبے کی روایات سے روشناس کرایا۔واضح ہو کہ شعبۂ اردو ، ستیہ وتی کالج اپنی سرگرمیوں کی وجہ سے پورے ملک میں مشہور و معروف ہے۔ شعبۂ اردو کی فعالیت سے متاثر ہو کر ملک کے متعدد علاقوں سے بڑی تعداد میں طلبا وطالبات نے 2025میں ستیہ وتی کالج کو منتخب کیا ہے۔
بزم ادب کی طرف سےجن نووارد طلبا و طالبات کو سند اور مومنٹو سے نوازا گیا ان میں فرحین، محمد یونیب، ثنا، محمد سیف، مہک، محمد فرمان، محمد سالک، رمشا فیروز، محمد نعمان نسیم، انہا خان، محمد افروز، آسیہ خاتون، محمد انصب سراج، رفیق عالم، فرحین، اریبہ، ماہِ نور، اقرا رحمان، ارم پروین، محمد فیاض رضا، کاشف مشتاق، شاہ رخ عالم، نجمہ کوثر، انجم، ریحان ملک اور شفا فاطمہ وغیر ہ کے اسما قابل ذکر ہیں۔ ان کے علاوہ مزید کچھ طلبہ کو تشجیعی انعام سے نوازا گیا۔
پروگرام کے آخر میں شکریہ ادا کرتے ہوئے کہا کہ عفان پٹھان، گل افشاں، محمد عابد حسین اور فرحین نے کہا کہ ’’یہ استقبالیہ محض ایک تقریب نہیں، بلکہ تعلق اور تعاون کی نئی بنیاد ہے۔
