بارہ بنکی(ابوشحمہ انصاری) گزشتہ دنوں جموں و کشمیر کے پہلگام دہشت گردانہ حملے میں بے گناہ سیاحوں پر دہشت گردوں کے ذریعے کی گئی اندھا دھند فائرنگ میں ہلاک شدگان اور زخمیوں کے اہل خانہ سے اظہار غم اور ہمدردی میں بارہ بنکی کے مدرسہ جامعہ مدینۃ العلوم رسولی میں کینڈل مارچ نکالا گیا۔
جس میں حافظ ایازاحمدمدینی نے کہا کہ بروز منگل جموں و کشمیر میں بے گناہوں کے ساتھ جو دہشت گردانہ اور سفانہ کھیل کھیلا گیا ہے۔ اس کی ہم شدید مذمت کرتے ہیں۔ اس طرح کے حملے انسانیت اور امن کے خلاف ہیں۔ کوئی بھی مذہب ایسے حملوں کی بالکل اجازت نہیں دیتا ہے۔ وہاں ماضی میں بھی اس طرح کے مذموم حملے ہوتے رہے ہیں۔
ہم مرکزی حکومت سے اپیل کرتے ہیں کہ پہلگام دہشت گردانہ حملے کے گنہگاروں کو گرفتار کرکے سخت سے سخت سزا دیکر ان کے آقاؤں پربھی لگام لگانے کا کام کی جائے۔ تاکہ کوئی بھی ایسی بزدلانہ کاروائی کرنے کی ہمت نہ کرسکے۔ جامعہ کے پرنسپل مولانا مقبول احمدقاسمی نے کہا کہ اس حملے کے ذریعے ہمارے ملک میں بدامنی پھیلانے کی ناکام کوشش کی گئی ہے۔
عام شہریوں پر حملہ کرکے ان میں خوف و ہراس پیدا کرنا بذدلوں کا کام ہے۔ اس حملے میں جو ہلاک ہوچکے ہیں ان کو ہم خراج عقیدت پیش کرتے ہیں۔ اور ان کے اہل خانہ کےغم میں برابر شریک ہیں۔ اور جو زخمی ہوئے ہیں ان کی جلد صحتیابی کی دعا کرتے ہیں۔ ہم چاہتے ہیں کہ ملک میں امن و سلامتی کا ماحول قائم رہے۔ اس موقع پر جامعہ میں طلبہ کے علاوہ اساتذہ موجود رہے۔
