لکھنٶ(پریس ریلیز/ابوشحمہ انصاری)آل انڈیا مائنارٹیز فورم فار ڈیموکریسی کے قومی صدر ڈاکٹر عمار رضوی نے پاکستان کے دارالحکومت اسلام آباد میں امام بارگاہ خدیجتہ الکبری کے قریب نمازِ جمعہ کے وقت پیش آنے والے دہشت گردانہ حملے کی سخت الفاظ میں مذمت کی ہے۔ انہوں نے اس واقعے کو انسانیت کو شرمسار کرنے والا عمل قرار دیتے ہوئے کہا کہ عبادت گاہوں کے اطراف تشدد کی کارروائیاں امنِ عالم اور انسانی اقدار پر براہِ راست حملہ ہیں۔
ڈاکٹر عمار رضوی نے واقعے میں شہید ہونے والے افراد کی شہادت پر گہرے رنج و غم کا اظہار کرتے ہوئے کہا کہ معصوم جانوں کا ضیاع ناقابلِ تلافی نقصان ہے۔ انہوں نے شہداء کے لیے مغفرت اور بلندیِ درجات کی دعا کی اور زخمیوں کی جلد صحت یابی کے لیے نیک تمناؤں کا اظہار کیا۔
انہوں نے کہا کہ دہشت گردی کی کوئی سرحد، کوئی مذہب اور کوئی جواز نہیں ہوتا۔ بے گناہوں کو نشانہ بنانا کسی نظریے کی نمائندگی نہیں کرتا بلکہ یہ انسان دشمن سوچ کی عکاسی ہے۔
عمار رضوی نے خبر کے ذریعے حکومتِ پاکستان اور قانون نافذ کرنے والے اداروں سے مطالبہ کیا کہ واقعے کی شفاف اور مؤثر تحقیقات کر کے ذمہ دار عناصر کو قانون کے کٹہرے میں لایا جائے اور عبادت گاہوں سمیت حساس مقامات کی سیکیورٹی کو مزید مضبوط کیا جائے۔ ساتھ ہی انہوں نے عوام سے اپیل کی کہ اس طرح کے واقعات سماجی تانے بانے کو پاش پاش کرنے کی منشا سے کئے جاتے ہیں اس لیے وہ نفرت کے بیانیے کے مقابلے میں امن، رواداری اور انسان دوستی کے پیغام کو فروغ دیں۔
ڈاکٹر رضوی نے کہا کہ اس نوعیت کے واقعات پوری دنیا کے ضمیر کو جھنجھوڑ دینے کے لیے کافی ہیں اور عالمی برادری کا دہشت گردی کے خلاف متحد ہونا ہی پائیدار امن کی واحد راہ ہے۔
