مدارس کو درپیش چیلنجز، جمعیۃ علماء کے تعمیراتی پروگرامز، مثالی و غیر مثالی اضلاع کی کارکردگی سمیت متعدد امور پر غور ہوگا
کانپور (محمد عثمان قریشی) ملک میں مدارسِ اسلامیہ کو درپیش نئے خطرات، تعلیمی محاذ پر مسلمانوں کی نمائندگی، اور دینی اداروں کے دفاع کی بڑھتی ہوئی ضرورت کے پیش نظر جمعیۃ علماء ہند کی ہدایت پر جمعیۃ علماء وسطی زون اترپردیش کا دو روزہ صوبائی مشاورتی اجلاس آج 21 مئی بروز بدھ بعد مغرب جمعیۃ بلڈنگ رجبی روڈ میں منعقد ہوگا، جس میں زون کے تمام اضلاع کے صدور، نظماء، مثالی اضلاع کے کنوینر، اور فعال ذمہ داران شرکت کریں گے۔
مشورے کے دوران گزشتہ چھ ماہ کی کارگزاری کا جائزہ، مدارس کو لاحق خطرات پر تفصیلی گفتگو، ممبرسازی مہم کی پیش رفت، اور جمعیۃ کے جاری ترقیاتی منصوبوں کا تجزیہ کیا جائے گا۔
اجلاس کی سب سے اہم نشست 22/مئی جمعرات کو صبح9/بجے جامع مسجد اشرف آباد میں منعقد ہونے والا تحفظِ مدارس کنونشن ہوگا۔ جس میں جمعیۃ علماء ہند کے قومی صدر مولانا سید محمود مدنی کی خصوصی شرکت ہوگی۔ اس کنونشن میں مشرقی اترپردیش کے چالیس سے زائد اضلاع سے تین سو سے زائد مدارس کے نمائندے شریک ہوں گے۔ کنونشن میں نہ صرف موجودہ صورتِ حال پر گفتگو ہوگی، بلکہ اجتماعی فیصلوں کے ذریعے آئندہ حکمتِ عملی بھی مرتب کی جائے گی۔
جمعیۃ علماء اترپردیش کے نائب صدر مولانا امین الحق عبداللہ قاسمی نے بتایا کہ ریاست بھر میں مدارسِ اسلامیہ کو منظوری نہ ہونے کے نام پر دیے جانے والے نوٹس اور بندش کے اقدامات غیر منصفانہ اور امتیازی ہیں، جس پر جمعیۃ علماء ہند خاموش نہیں رہ سکتی۔ اس کنونشن کے ذریعے ہم ذمہ دارانِ مدارس کی آواز کو ایک منظم شکل دیں گے اور ہر ممکن قانونی، تنظیمی اور عوامی جدوجہد کے ذریعے مدارس کے تحفظ کا فریضہ ادا کریں گے۔
انہوں نے مزید کہا کہ جمعیۃ علماء ہند روزِ اول سے ہی ملک و ملت دونوں کی تعمیر و تحفظ کے لیے سرگرم ہے۔ عدالتوں سے لے کر وزارتی دفاتر تک، مدارس، مکاتب اور مساجد کے دفاع میں کوئی کسر نہیں چھوڑی گئی، اور یہ سلسلہ اب بھی جاری ہے۔اجلاس میں ملک کے ممتاز علماء کرام، بالخصوص مفتی سید محمد عفان منصورپوری اور مولانا حکیم الدین قاسمی کی شرکت بھی متوقع ہے، جو اجلاس کو علمی گہرائی، فکری رہنمائی اور تنظیمی بصیرت عطا کریں گے۔
جمعیۃ علماء وسطی زون کے ناظمِ اعلیٰ مفتی ظفر احمد قاسمی نے بتایا کہ یہ اجلاس محض ایک رسمی نشست نہیں بلکہ تنظیمی استقامت، دینی حمیت اور عملی بصیرت سے بھرپور ایک تاریخی مرحلہ ہوگا، جس کے اثرات زون کی سطح سے آگے بڑھ کر ریاست گیر سطح پر محسوس کیے جائیں گے۔
