سرولی غوثپور کے خرد مٸو میں محبت، رواداری اور بھائی چارے کا پیغام عام کیا
بارہ بنکی (نامہ نگار) عیدالاضحی کے پُرمسرت موقع پر سرولی غوثپور قصبے میں روحانی مسرت اور سماجی ہم آہنگی کا حسین منظر دیکھنے کو ملا، جب کانگریس سوشل میڈیا ضلع صدر محمد ذیشان اور نوائے جنگ لندن کے یوپی بیورو چیف ابوشحمہ انصاری نے سرولی غوثپور کے بلاک سکریٹری محمد اویس انصاری کے خرد مٸو مکان پر جا کر انہیں اور اہل خانہ کو عید کی دلی مبارکباد پیش کی۔
دونوں لوگوں نے اس موقع پر نہ صرف بلاک سکریٹری محمد اویس انصاری سے ملاقات کی بلکہ مقامی افراد سے بھی خیرسگالی اور محبت کا پیغام عام کیا۔ اس دوران قصبے کے معززین، بزرگوں اور نوجوانوں نے بھی عید کی خوشیوں میں بھرپور حصہ لیا۔
محمد ذیشان نے کہا عید قربانی ایثار اور محبت کی علامت ہے۔ ہمیں چاہیے کہ اس مقدس جذبے کو اپنی زندگیوں میں اپنائیں اور تمام اقلیتوں و اکثریتی طبقات کے ساتھ بھائی چارے کو مضبوط کریں۔
ابوشحمہ انصاری نے اپنے خیالات کا اظہار کرتے ہوئے کہا ایسے مواقع ہمیں ایک دوسرے کے قریب لاتے ہیں۔ سماجی یگانگت اور بھائی چارہ ملک کی ترقی کی بنیاد ہیں۔ عید کی روح کے مطابق ہمیں اپنے گھروں اور معاشرے میں محبت، برداشت اور امن کے پیغام کو عام کرنا چاہیے تاکہ ہم سب مل کر خوشحال اور خوشگوار زندگی گزار سکیں۔
مقامی لوگوں نے مہمانوں کا پرتپاک استقبال کیا اور اس بات پر زور دیا کہ عید جیسے تہوار محبت و اخوت کے پیغام کو فروغ دینے کا بہترین موقع ہوتے ہیں، جو معاشرتی نفرتوں کو ختم کرنے میں مددگار ثابت ہوتے ہیں۔
یہ ملاقات خوشگوار ماحول میں مکمل ہوئی، اور سب نے ایک دوسرے کو عید کی مبارکباد پیش کرتے ہوئے ملک میں امن، خوشحالی اور بھائی چارے کے لیے دعائیں کیں۔
