موسم سرماء میں لحاف اور کمبل کی تقسیم اہم فریضہ: قاضئ شہرعبد القدوس ہادی

کانپور( محمد عثمان قریشی) آج شہری جمعیۃ علماء کانپور کے زیر اہتمام متصل مسجد عائشہ جامعہ عربیہ اشاعت العلوم قلی بازار کانپور میں قاضیئ شہر کانپور الحاج حافظ و قاری عبد القدوس ہادی نائب صدر جمعیۃ علماء اتر پردیش کی سرپرستی و مولانا ابوبکر ہادی قاسمی کنوینر اصلاح معاشرہ کمیٹی شہری جمعیۃ علماء کانپور کی نگرانی میں سیکڑوں ضرورتمندوں میں لحاف اور کمبل تقسیم کئے گئے۔ اس موقع پر قاضیئ شہر حافظ عبد القدو س ہادی نے کہا کہ یہ کام انسانیت کی مدد کے جذبے سے شہری جمعیۃ علماء کانپور کے بینر تلے گزشتہ پندرہ دنوں سے کیا جارہا ہے اور انشاء اللہ آئندہ بھی اس عمل کو جاری رکھا جائے گا۔ انہوں نے کہا کہ بلا تفریق مذہب و ملت یہ کام شہری جمعیۃ علماء کانپور برسوں سے کرتی آ رہی ہے۔ انہوں نے مزید کہا کہ تعلیمات نبویؐ کے مطابق پڑوسیوں کے ساتھ حسن سلوک اور حسن معاشرت کا خصوصی اہتمام کرنے کی تاکید کی گئی ہے۔ صحیح مسلم کی حدیث ہے کہ آپؐ نے فرمایا کہ جب تک تم اپنے پڑوسی کے ساتھ حسن سلوک نہیں کرتے، تب تک تم کامل مومن نہیں بن سکتے، پڑوسی کی عزت، ان کی ضروریات کا خیال رکھنا، اور ان کے حقوق کا احترام کرنا ضروری ہے۔ اگر پڑوسی کو کسی مدد کی ضرورت ہو، تو ان کی مدد کرنی چاہیے، چاہے وہ مالی ہو یا جسمانی۔ پڑوسیوں کو تکلیف دینے سے بچنا چاہیے، اگر پڑوسی خوش ہوں تو ان کی خوشی میں شریک ہونا چاہیے اور اگر وہ غم میں ہوں تو ان کے غم میں شریک ہونا چاہیے۔ اللہ کے رسولؐ نے پڑوسی کے ساتھ حسن سلوک کو ایمان کی علامت قرار دیا ہے، اور اس کی بنیاد پر معاشرت میں محبت، امن اور بھائی چارے کو فروغ دینے کی تعلیم دی ہے۔جان لیں کہ یہ امدادی کام کوئی بھی تنظیم اکیلے تنہہ نہیں کر سکتی اس لئے شہر کانپور کے اہل خیر حضرات سے گزارش کی جاتی ہے کہ ہمارے تنظیم شہری جمعیۃ علماء کانپور کا اس مہم میں بھرپور تعاون فرما کر عنداللہ ماجور ہوں۔ جیسا کہ ہم جانتے ہیں کہ مسلمان برادری میں، یہ عمل صدقہ و خیرات کے جذبے کے تحت کیا جاتا ہے، جسے اسلام میں بہت زیادہ اہمیت دی گئی ہے۔ لحاف و رضائی کی تقسیم نہ صرف ایک فرد کی ذمہ داری ہے بلکہ یہ پورے معاشرے کی اجتماعی ذمہ داری بن جاتی ہے۔ اگر ہر فرد اپنے حصہ کا کام کرے، تو پورا معاشرہ ایک دوسرے کا ساتھ دے کر اس مشکل وقت میں انسانوں کی مدد کر سکتا ہے۔ اس طرح کے کام سے انسانوں کے درمیان محبت، تعاون اور بھائی چارے کا جذبہ بڑھتا ہے، اور معاشرتی ہم آہنگی میں اضافہ ہوتا ہے۔ موسم سرما میں غریبوں میں لحاف اور کمبل کی تقسیم ایک اہم فلاحی عمل ہے جو انسانیت کی خدمت اور ہمدردی کا بہترین نمونہ پیش کرتا ہے۔ اس طرح کی سرگرمیاں نہ صرف غریبوں کی زندگی میں سہولت پیدا کرتی ہیں بلکہ پورے معاشرے کو بہتر بنانے میں اہم کردار ادا کرتی ہیں۔ ہر فرد کی یہ ذمہ داری بنتی ہے کہ وہ اپنی حیثیت کے مطابق اس عمل میں شریک ہو اور غربت اور بھوک کے شکار افراد کی مدد کرے تاکہ ضرورتمندوں سردیوں کی سختیوں سے نجات مل سکے۔ اس عمل کے ذریعہ سے ہم نہ صرف دنیا میں انسانیت کے اصولوں کو زندہ رکھنے والے انسان کہلائیں گے بلکہ آخرت میں بھی ان اعمال کا بہترین انعام حاصل کر سکیں گے۔اس موقع پر خصوصی طور پر قاضیئ شہر حافظ عبد القدوس ہادی کے علاوہ مولانا عبد القادر قاسمی استاذ جامعہ ہٰذا، مولانا ابوبکر ہادی قاسمی، عثمان قریشی، راج کمار وغیرہ موجود رہے۔