لکھنؤ، (ابوشحمہ انصاری) اتر پردیش کے سابق ممبرانِ اسمبلی کے ایک وفد نے سابق کارگزار وزیر اعلیٰ اور سینئر سیاستداں ڈاکٹرعمار رضوی کی صدارت میں معزز اسپیکر، اتر پردیش اسمبلی، ستیِش مہانا سے ملاقات کی، انہیں پونے میں”Ideal Speaker of the Nation” اعزاز ملنے پر مبارکباد پیش کی۔
اس موقع پر ادارے کی مجلسِ عاملہ کی قرارداد سے آگاہ کرتے ہوئے یہ تجویز پیش کی گئی کہ ستیِش مہانا کی شاندار قیادت، پارلیمانی امور میں مہارت اور ریاستی اسمبلی کے وقار کو ہندوستان میں بلند کرنے کے اعتراف میں انہیں ہندوستانی پارلیمنٹ کے پہلے اسپیکر رہے "بابا صاحب ماوالنکر” اعزاز سے نوازا جائے۔ اس کے ساتھ ساتھ اسمبلی کے پرنسپل سکریٹری کی خدمات کو تسلیم کرتے ہوئے انہیں "Kaul & Shakdher” اعزاز دینے کی بھی سفارش کی گئی۔
وفد نے معزز اسپیکر سے درخواست کی کہ ان اعزازات کے لیے جلد از جلد کوئی مناسب تاریخ طے کرکے ادارے کو مطلع کیا جائے تاکہ ایک باوقار تقریب کا انعقاد ممکن ہو سکے۔
اس موقع پر ڈاکٹرعمار رضوی کے ساتھ سابق ایم ایل اے و موجودہ ایم ایل اے کالپی، جالون، وِنود چترویدی، مدھوکر جیٹلی، منی شنکر پانڈے، مادھو پرساد اور پرماتما سنگھ بھی موجود رہے۔ یہ اطلاع ڈاکٹر عمار رضوی کے پرسنل سکریٹری جمیل حسن نقوی نے فراہم کی ہے۔
