لکھنؤ(محمد عثمان قریشی) انڈین یونین مسلم لیگ (IUML) اترپردیش کے صوبائی صدر ڈاکٹر محمد متین خاں نے آر ایس ایس کے سربراہ موہن بھاگوت کے حالیہ بیانات پر ردِّعمل ظاہر کرتے ہوئے کہا ہے کہ ان کی بیان بازی "زمینی حقائق سے بالکل مختلف” ہے۔
ڈاکٹر متین نے کہا کہ "بھاگوت یہ نصیحت کرتے ہیں کہ مذہب کا مطلب ہے سب کو اپنائیت کے جذبے سے دیکھنا اور مختلف مذاہب کو ہم آہنگی کے ساتھ آگے بڑھانا، لیکن بی جے پی کی حکومت والی ریاستوں میں حقیقت اس کے بالکل برعکس ہے۔”
انہوں نے الزام لگایا کہ بی جے پی، جو آر ایس ایس کا سیاسی بازو ہے، اس کی حکومت والی کئی ریاستوں میں مسلمانوں، عیسائیوں اور دیگر غیر ہندو شہریوں کو ظلم و ستم کا نشانہ بنایا جا رہا ہے۔
ڈاکٹر متین نے کہا کہ اتر پردیش میں ہزاروں مسلمانوں کے مکانات، مدارس، مساجد، مزارات اور دکانیں مسمار کر دی گئی ہیں۔ وزیر اعلیٰ یوگی آدتیہ ناتھ کھلے عام مسلمانوں کے خلاف اپنے تعصب کا اظہار کرتے ہیں۔
انہوں نے مزید کہا کہ مسلمانوں کے خلاف نفرت انگیز تقاریر اور بھیڑ کے ذریعے کی جانے والی ہلاکتیں معمول بن چکی ہیں۔ بی جے پی رہنما کھلے عام مسلمانوں کے معاشی بائیکاٹ کی اپیل کرتے ہیں۔ مسلمانوں کو زبردستی مذہبی نعرے لگوانا، بجرنگ دل اور انتہا پسند ہندوتوادی تنظیموں کا روزمرہ کا مشغلہ بن گیا ہے اور حکومت ان کے خلاف کارروائی کرنے میں ناکام ہے۔
ڈاکٹر متین نے حالیہ سنبھل واقعہ کا ذکر کرتے ہوئے کہا کہ جامع مسجد کی جگہ مندر کا غیر قانونی دعویٰ کر کے مسلمانوں کو اشتعال دلایا گیا۔ احتجاج کرنے پر پولیس نے براہِ راست فائرنگ کی، جس میں چار نوجوان شہید ہوئے اور بڑی تعداد میں لوگ زخمی و گرفتار ہوئے۔ اس کے بعد یوگی حکومت نے ایک کمیشن بنایا، جس کی خفیہ رپورٹ کو عام کرکے الٹا مسلمانوں کو ہی قصوروار ٹھہرانے کی کوشش کی گئی۔
انہوں نے یہ بھی الزام لگایا کہ ایک "سازش” کے تحت بڑی تعداد میں مسلم ووٹروں کے نام ووٹر لسٹ سے حذف کیے جا رہے ہیں، تاکہ قومی سیاست میں ان کے کردار کو کمزور کیا جا سکے اور انہیں دوسرے درجے کا شہری بنا دیا جائے۔
ڈاکٹر متین خاں نے خبردار کیا کہ "اگر ایسے مظالم بند نہ کیے گئے اور مسلمانوں، عیسائیوں اور دیگر غیر ہندو شہریوں کو ہندوؤں کے برابر تحفظ کا احساس نہ دلایا گیا، تو شمولیاتی بھارت کا دعویٰ کھوکھلا ثابت ہوگا۔”
انہوں نے کہا کہ بصورت دیگر یہ بھی ظاہر ہو جائے گا کہ وزیر اعظم نریندر مودی اور وزیر داخلہ امیت شاہ کی قیادت والی بی جے پی کو اب آر ایس ایس کی ہدایت کی ضرورت نہیں رہی، جیسا کہ حال ہی میں بی جے پی صدر جے پی نڈا نے خود کہا۔
