قاضئ شہر کانپور نے 3 دسمبر کو ہونے والی کانفرنس کی تیاریوں کا جائزہ لیا

کانپور (محمد عثمان قریشی) قاضئ شہر کانپور الحاج حافظ و قاری عبد القدوس ہادی نائب صدر جمعیۃ علماء اتر پردیش و صدر مجلس تحفظ ختم نبوتؐ کانپور نے آج حلیم انٹر کالج چمن گنج کانپور کا معائنہ کیا اور وہاں کی انتظامیہ کے ذمہ داران سے بات چیت کی۔ واضح ہو کہ آئندہ 3 دسمبر 2024 بروز منگل بعد نماز عشاء بمقام حلیم انٹرکالج چمن گنج کانپور میں ایک روزہ عظیم الشان تحفظ ختم نبوتؐ و عظمت صحابہ کانفرنس منعقد ہونے جا رہی ہے جس میں شہر و اطراف شہر سے ہزاروں کی تعداد میں سامعین پہنچیں گے، اور ملک کے مشہور و معروف علماء کرام، مفتیان عظام اور فرقہ باطلہ کے ماہر مربیان حضرات کانفرنس میں شرکت کر کے اپنے قیمتی بیانات سے لوگوں کو مستفید کریں گے، لہٰذا حال ہی میں اپنے سفر عمرہ سے لوٹے قاضیئ شہر نے اپنی قیادت کا بھار سنبھالتے ہوئے کانفرنس سے متعلق تمام تیاریوں کا قبل از وقت جائزہ لیتے ہوئے کانفرنس کے مقام انعقاد حلیم انٹر کالج پہنچے اور وہاں کے ذمہ داران سے جائے کانفرنس کی وسعت، داخلہ و خارجی راستوں سمیت دیگر ضروری نکات بات چیت کرتے ہوئے معائنہ کیا تاکہ کانفرنس میں پہنچے سامعین کو کسی قسم کی کوئی دقت نہ ہو، انہوں نے بھی یقینی کیا کہ کس مقام پر اسٹیج قائم کیا جائے گا اور کتنی مقدار میں سامعین کیلئے جگہ چھوڑی جائے گی، انہوں نے خصوصی طور پر خواتین کیلئے بھی جگہ کا تعین کیا تاکہ اس کانفرنس میں خواتین بھی پردہ میں رہ کر کانفرنس کا مشاہدہ کر سکیں۔ اس موقع پر قاضیئ شہر کے علاوہ کنوینر کانفرنس مولانا ابوبکرہادی قاسمی،شبو انصاری کارپوریٹر بیکن گنج کانپور، مولانا مجیب اکرام ندوی، مولانا عمر فاروق ہادی قاسمی کے ساتھ ہی حلیم انٹر کالج کے ذمہ داران موجود رہے۔