نوجوانوں کے ذہنوں میں موجود سوالات کا مدلل جواب دینے کی اشد ضرورت: مولانا امین الحق عبداللہ قاسمی
جمعیۃ علماء شہر و مجلس تحفظ ختم نبوت کانپور کی جانب سے 13/ فروری تا27/ فروری استقبال رمضان و تفہیم دین میں سوالات پوچھنے کا موقع بھی فراہم کیا جائے گا۔
کانپور۔ ( محمد عثمان قریشی) جمعیۃ علماء شہر اور مجلس تحفظ ختم نبوت کانپور کے زیر اہتمام حسب سابق اس سال بھی ماہِ رمضان کی روحانی برکات سے مستفید ہونے، روزہ، تراویح اور اعتکاف کے مسائل سے آگاہی فراہم کرنے اور شکوک و شبہات کے ازالے کے لیے خصوصی سلسلہ خطابات و سوالات و جوابات بعنوان استقبال رمضان و تفہیم دین کا انعقاد کیا جا رہا ہے۔ یہ بابرکت پروگرام مفتی عبدالرشید قاسمی کی صدارت، ڈاکٹر حلیم اللہ خان کی سرپرستی اور مولانا امین الحق عبداللہ قاسمی کی نگرانی میں 14 شعبان المعظم 1446ھ مطابق 13 فروری 2025ء سے 28 شعبان المعظم 1446ھ مطابق 27 فروری 2025ء تک شہر اور اس کے نواحی علاقوں میں جاری رہے گا۔
استقبال رمضان سے متعلق ان مجالسِ علم و تربیت کا بنیادی مقصد عوام الناس کو رمضان کی روحانی تیاری میں معاونت فراہم کرنا، دینی شعور کو اجاگر کرنا اور نوجوان نسل خصوصاً لڑکے اور لڑکیوں کو دین سے قریب کرنا ہے۔ ان نشستوں میں نہ صرف اسلامی مسائل پر روشنی ڈالی جائے گی بلکہ شرکاء کو سوالات کرنے اور اپنے شکوک و شبہات کے ازالے کا بھی بھرپور موقع دیا جائے گا۔
مجلس تحفظ ختم نبوت کانپور کے صدر مولانا امین الحق عبداللہ قاسمی، شہری جمعیۃ علماء کے نائب صدر مولانا نورالدین احمد قاسمی، مولانا محمد اکرم جامعی، کنوینر مفتی اظہار مکرم قاسمی نے تفصیلات فراہم کرتے ہوئے کہا کہ یہ پروگرام شہر کی مختلف مساجد، مدارس اور دیگر مقامات پر منعقد کیے جائیں گے،
- 13 فروری بعد نماز عشاء: مسجد ابراہیم، گنگا پار۔
- 15 فروری بعد نماز ظہر: اجتماع خواتین، بعد نماز عشاء: مسجد رابعہ، گنگاپار۔
- 16 فروری بعد نماز عشاء: مسجد رئیس باغ، تلک نگر۔
- 17 فروری بعد نماز عشاء: مکتب الحرمین، طلاق محل۔
- 18 فروری: مسجد شیخ للن، قلی بازار۔
- 19 فروری: مصلی بشیر باغیچہ، روشن نگر۔
- 20 فروری بعد نماز ظہر: اجتماع خواتین، مدرسہ عاشق العلوم، جوہی لال کالونی۔
- 21 فروری بعد نماز عشاء: کرنیل گنج، اور مدرسہ مفتاح القرآن رمئی پور۔
- 22 فروری بعد نماز عشاء: جامع مسجد اشرف آباد، جاجمؤ اور محلہ پرانا کانپور۔
- 23 فروری بعد نماز ظہر: اجتماع خواتین، فرزانہ ٹینری، اشرف آباد، بعد نماز عشاء: محمودیہ مسجد، اجیت گنج، بابوپوروہ۔
- 24 فروری بعد نماز عصر: مسجد مدح خاں، فیتھفل گنج، بعد نماز عشاء: مسجد رحیمیہ، میرپور، مسجد مکوشہید کا بھٹہ، پرانی چنگی، جاجمؤ۔
- 25 فروری بعد نماز عشاء: مسجد حنفیہ، انصار نگر، بھینسیا احاطہ، بیکن گنج۔
- 26 فروری بعد نماز عشاء: چھوٹی مسجد، پرم پوروہ۔
- 27 فروری بعد نماز عشاء: مسجد بخشو جراح، پٹکاپور اور جامع مسجد، لال بنگلہ طے کیے گئے ہیں۔
مولانا امین الحق عبداللہ قاسمی نے زور دے کر کہا کہ موجودہ دور میں نوجوانوں کو دین کی صحیح سمت دکھانے اور ان کے ذہنوں میں پیدا ہونے والے سوالات کا مدلل جواب دینے کی اشد ضرورت ہے۔ اس مقصد کے پیش نظر استقبال رمضان کے موقع پر ان خصوصی نشستوں میں نوجوانوں کی بھرپور شرکت کی توقع کی جا رہی ہے، جہاں انہیں سوالات کرنے اور معتبر علماء کرام سے براہِ راست استفادہ کرنے کا موقع فراہم کیا جائے گا۔ انہوں نے بتلایا کہ درج بالا پروگراموں کے علاوہ مزید پروگرام ترتیب دئیے جارہے ہیں جن کی تفصیلات سے جلد آگاہ کیا جائے گا۔
انہوں نے تمام مسلمانوں سے اپیل کی کہ وہ ان بابرکت نشستوں میں زیادہ سے زیادہ تعداد میں شرکت کریں اور رمضان کی تیاری میں اپنی اصلاح اور دین کے علم سے اپنے قلوب کو منور کریں۔ خاص طور پر والدین کو چاہیے کہ وہ اپنے بچوں اور بچیوں کو ان پروگراموں میں ضرور شامل کریں تاکہ نئی نسل دینِ اسلام کی روشنی سے فیض یاب ہو سکے۔
