آصف جمیل امجدی
اسلام میں انسانی حقوق کی ضمانت: اسلام، جسے دینِ فطرت کہا جاتا ہے۔ اپنی ابتدا سے ہی انسانی حقوق کی ضمانت فراہم کرتا آیا ہے۔ یہ دین نہ صرف اللہ کی بندگی کا پیغام دیتا ہے۔ بلکہ انسانیت کی عظمت، مساوات، اور عدل و انصاف کے اصولوں پر مبنی ایک ایسا نظام حیات پیش کرتا ہے۔ جس میں ہر فرد کو بنیادی حقوق دیے گئے ہیں۔ آج کے دور میں جب انسانی حقوق کی بحث ہر جگہ سنائی دیتی ہے۔ اسلام کا پیغام اس موضوع پر روشنی ڈالتا ہے اور انسانیت کے لیے ایک مثالی رہنما ثابت ہوتا ہے۔
مساوات کا پیغام:
اسلام میں انسانی حقوق کی ضمانت کے مختلف پہلو کی بات کریں تواسلام نے چودہ سو سال پہلے مساوات کا جو تصور دیا۔ وہ آج کے جدید دور کے تمام فلسفوں سے بالاتر ہے۔ اللہ تعالیٰ نے قرآن مجید میں فرمایا۔
إِنَّ أَكْرَمَكُمْ عِندَ اللَّهِ أَتْقَاكُمْ
ترجمہ: تم میں سب سے زیادہ معزز وہ ہے جو سب سے زیادہ متقی ہے۔
یہ آیت واضح کرتی ہے کہ اسلام میں رنگ، نسل، زبان یا قومیت کی بنیاد پر کسی قسم کی برتری نہیں ہے۔ ہر انسان کو برابر حقوق حاصل ہیں اور ہر فرد کو اس کے اعمال کے مطابق پرکھا جاتا ہے۔
غلامی کا خاتمہ:
اسلام نے دنیا کو غلامی کی زنجیروں سے آزاد کرنے کا سب سے پہلا اور مؤثر نظام پیش کیا۔ غلاموں کو آزاد کرنے کی حوصلہ افزائی کی گئی اور ان کے ساتھ حسنِ سلوک کی تعلیم دی گئی۔ حضور نبی اکرم ﷺ نے فرمایا:
"تمہارے غلام تمہارے بھائی ہیں۔ ان کے ساتھ وہی سلوک کرو جو اپنے بھائیوں کے ساتھ کرتے ہو۔
یہ تعلیمات آج کے انسانی حقوق کے چارٹر کی بنیاد بن سکتی ہیں۔
خواتین کے حقوق:
اسلام نے خواتین کو وہ حقوق دیے۔ جو اس سے پہلے کسی مذہب یا تہذیب نے نہیں دیے تھے۔ وراثت میں حصہ، تعلیم کا حق، اور معاشرتی احترام اسلام کی وہ عطائیں ہیں۔ جو عورت کی عظمت کو بلند کرتی ہیں۔ حضور ﷺ نے فرمایا:
"تم میں بہترین وہ ہے جو اپنی بیوی کے ساتھ اچھا سلوک کرے۔
یہ حدیث عورتوں کے ساتھ حسنِ سلوک اور ان کے تحفظ کا واضح اعلان ہے۔
کمزوروں کا تحفظ:
اسلام نے کمزوروں، یتیموں، اور محتاجوں کے حقوق کو بڑی اہمیت دی ہے۔ قرآن مجید میں بار بار یتیموں کے ساتھ اچھا سلوک کرنے اور محتاجوں کی مدد کرنے کی تلقین کی گئی ہے۔ زکوٰۃ اور صدقات کا نظام کمزوروں کی ضروریات پوری کرنے کے لیے ہی بنایا گیا ہے۔
اسلام کا نظامِ حقوق انسانی، عدل و انصاف، اور مساوات پر مبنی ہے۔ یہ نہ صرف دنیا کو ایک بہتر معاشرہ فراہم کرتا ہے بلکہ آخرت میں کامیابی کی ضمانت بھی دیتا ہے۔ آج کے دور میں، جب دنیا انسانی حقوق کی تلاش میں سرگرداں ہے۔ اسلام کا پیغام ایک مشعلِ راہ کے طور پر سامنے آتا ہے۔
یہ اسلام کا پیغام ہے، جو آج بھی ہر انسان کے دل کی آواز بن سکتا ہے۔
