بارہ بنکی(ابوشحمہ انصاری)ایم آئی میموریل انٹر کالج، بنوک، رامپور ضلع بارہ بنکی کے ہونہار طلبہ و طالبات نے ہائی اسکول اور انٹر میڈیٹ کے سالانہ امتحانات میں شاندار کارکردگی کا مظاہرہ کرتے ہوئے ادارے اور علاقے کا نام فخر سے بلند کیا ہے۔
ہائی اسکول (انگلش میڈیم) میں فاطمہ زہرا نے 86.33 فیصد (518/600) نمبرات حاصل کرتے ہوئے پہلی پوزیشن حاصل کی، جب کہ ہائی اسکول (ہندی میڈیم) میں شائستہ پروین نے 85.33 فیصد (512/600) نمبرات کے ساتھ اپنی ذہانت اور محنت کا لوہا منوایا۔
انٹرمیڈیٹ میں سدرہ بانو نے 78.8 فیصد (394/500) اور محمد حمزہ نے 78.6 فیصد (393/500) نمبرات حاصل کر کے نمایاں کامیابی حاصل کی۔
طلبہ کی اس تعلیمی کامیابی پر ادارے میں خوشی کی لہر دوڑ گئی۔ اس موقع پر کالج کے مینیجر محمد حلیم انصاری نے کہا ہمارے طلبہ و طالبات نے جس محنت اور لگن کا مظاہرہ کیا ہے، وہ قابلِ ستائش ہے۔ ان کی کامیابی نہ صرف ادارے کی تعلیمی معیار کی عکاس ہے بلکہ یہ والدین کے اعتماد اور اساتذہ کی انتھک محنت کا نتیجہ بھی ہے۔ ہم دعا گو ہیں کہ ہمارے طلبہ مستقبل میں بھی اسی جذبے اور عزم کے ساتھ آگے بڑھتے رہیں اور ملک و قوم کا نام روشن کریں۔
ایم آئی میموریل انٹر کالج کے پرنسپل منوج کمار نے کہا یہ کامیابی ہمارے تعلیمی ماحول، طلبہ کی مسلسل محنت اور اساتذہ کی رہنمائی کا ثمر ہے۔ ہمارا ادارہ ہمہ وقت معیاری تعلیم کے فروغ کے لیے پرعزم ہے اور آئندہ بھی طلبہ کی ہمہ جہت ترقی کے لیے ہر ممکن کوشش کرتا رہے گا۔
اساتذہ راکیش کمار اور دیگر عملے نے بھی کامیاب طلبہ و طالبات کو دل کی گہرائیوں سے مبارکباد پیش کی اور ان کے روشن مستقبل کے لیے نیک خواہشات کا اظہار کیا۔
کالج انتظامیہ نے اس موقع پر اس عزم کا اعادہ کیا کہ وہ تعلیمی معیار کو مزید بلندی تک پہنچانے کے لیے اپنی کوششیں جاری رکھے گی، تاکہ طلبہ نہ صرف امتحانات میں کامیابی حاصل کریں بلکہ زندگی کے ہر میدان میں کامیاب ہوں۔
