فخرالدین علی احمد گورنمنٹ پوسٹ گریجویٹ کالج میں شعبہ اردو کونسل کے زیر اہتمام ادبی پروگرام
بارہ بنکی(ابوشحمہ انصاری) تعلیم ایک بہتر معاشرہ تشکیل دیتی ہے۔ تعلیم کے ذریعے ہی ہم اپنی ثقافت اور تہذیب کا علم حاصل کرتے ہیں۔ ان خیالات کا اظہار شعبہ معاشیات کے پروفیسر ڈاکٹر محمد سعید نے فخرالدین علی احمد گورنمنٹ پوسٹ گریجویٹ کالج، محمود آباد، سیتا پور میں شعبہ اردو کی جانب سے منعقدہ ایک ادبی پروگرام میں کیا، جس میں ایک مباحثہ مقابلہ بعنوان "حال میں اردو کا مستقبل” اور غزل گائیکی کے مقابلے منعقد ہوئے۔ انہوں نے مزید کہا کہ اس طرح کے پروگرام طلباء کو ایک پلیٹ فارم اور اپنی صلاحیتوں کو دکھانے کا موقع فراہم کرتے ہیں۔ شعبہ کامرس کے پروفیسر ڈاکٹر سنجیو اگروال نے تعلیم کی اہمیت بیان کرتے ہوئے اپنی سریلی آواز میں ایک غزل سنائی۔ پروگرام کی نظامت کرتے ہوئے شعبہ اردو کے چیئر اسسٹنٹ پروفیسر ڈاکٹر داؤد احمد نے اپنے خیالات کا اظہار کرتے ہوئے کہا کہ شعبہ اردو کے زیر اہتمام منعقدہ دور حاضر کے مقابلے میں حصہ لینے والے طلباء ایک دن اپنی منفرد پہچان بنائیں گے اور اپنا اور کالج کا نام روشن کریں گے۔ اردو محبت اور آداب سکھاتی ہے۔ یہی وجہ ہے کہ زندگی کے تمام شعبوں سے تعلق رکھنے والے لوگ اپنی گفتگو میں کثرت سے اردو الفاظ کا استعمال کرتے ہیں۔ مباحثہ کے مقابلے میں بی اے سیکنڈ سمسٹر کی سحر بانو نے اول، بی اے چوتھے سمسٹر کی ماہ مریم نے دوم اور بی اے چھٹے سمسٹر کی فاطمہ زہرا نے سوم پوزیشن حاصل کی۔ غزل گائیکی کے مقابلے میں بی اے چوتھے سمسٹر کی ماہ مریم نے اول ، ایم اے چوتھے سمسٹر کی ثنا بانو نے دوم اور چھٹے سمسٹر کی علیشہ پروین نے سوم پوزیشن حاصل کی۔ ڈاکٹر محمد سعید اور ڈاکٹر سنجیو اگروال حکم تھے۔ مقابلے کے نتائج کا اعلان شعبہ کامرس کے پروفیسر ڈاکٹر سنترام سنگھ نے کیا۔ اس موقع پر کالج کے اساتذہ اور طلباء موجود تھے۔
