کانپور (محمد عثمان قریشی) آج دفتر جماعت اسلامی ہند ہمایوں باغ میں جماعت اسلامی ہند کے عہدے داران نے صحافیوں اور دیگر شخصیات کے اعزاز میں عید کی تقریبات کا انعقاد کیا اور ایک دوسرے کو عید کی خوشیاں بانٹیں، اس موقع پر جماعت اسلامی ہند کے سابق ریاستی صدر محمد نعیم نے کہا کہ ہم آپ سب کو عید الفطر کے موقع پر اپنی پرتپاک نیک خواہشات اور مبارکباد پیش کرتے ہیں۔ عیدالفطر کا یہ تہوار رمضان المبارک کے دوران ایک ماہ کے روزوں کی تکمیل پر اللہ تعالیٰ کی طرف سے عطا کردہ تحفہ ہے۔ ساتھ ہی خوشیوں کے تہوار میں عدم رواداری اور نفرت پر تشویش کا اظہار بھی کیا.
انہوں نے کہا کہ ہمارے ہندوستانی معاشرے میں عید کا تہوار ہمیشہ سے اہم کردار ادا کرتا رہا ہے۔ یہ مختلف مذاہب کے درمیان رابطہ ، رواداری اور باہمی احترام کو بڑھانے کا ایک طاقتور ذریعہ بھی رہا ہے۔ لیکن افسوس کا مقام یہ ہے کہ اب خوشیوں کے تہوار پر وہ ماحول نہیں رہا جیسا کہ ماضی میں تھا۔
ہمارے ملک میں تہوار ہمیشہ سے باہمی بھائی چارے اور دوستی کا ذریعہ رہے ہیں۔ لیکن پچھلے کچھ عرصے سے ملک میں بعض عناصر کی جانب سے سماج میں عدم برداشت اور نفرت کا رجحان بڑھتا جا رہا ہے۔ یہ افسوسناک اور قابل مذمت ہے اور معاشرے کے تانے بانے کو تورنے کا کام کر رہی ہےاور ہر انصاف پسند شہری کا خواہ کسی بھی مذہب کا ہو، اس سے پریشان ہونا فطری بات ہے۔ لیکن آج بھی ملک میں معزز اور انصاف پسند لوگوں کی ایک بڑی تعداد موجود ہے جو شکست تسلیم کرنے کو تیار نہیں اور اس غیر معمولی صورتحال کو بدلنے کی کوشش کر رہے ہیں۔
اسی تناظر میں جماعت اسلامی ہند کانپور عید کے اس تہوار پر اپنے شہر کے میڈیا اور عوام کو اپنی خوشیوں میں شامل کرنا چاہتی ہے اور آپ کے ذریعہ کانپور کے شہریوں کو عید کی مبارکباد اور سماجی ہم آہنگی کو دوبارہ قائم کرنے کا پیغام دینا چاہتی ہے۔اسموقع پر ڈاکٹر محمد عالم شہری صدر و دیگر عہدیداران موجود تھے ۔
