محمد ذیشان نے پیش کی دلی مبارکباد
بارہ بنکی (ابوشحمہ انصاری)بارہ بنکی ضلع کانگریس کے صدر محمد محسن کی دوبارہ تقرری پر پارٹی کارکنان میں زبردست جوش و خروش دیکھنے کو ملا۔ کارکنان نے اس فیصلے کا خیرمقدم کرتے ہوئے امید ظاہر کی کہ ان کی قیادت میں ضلع کانگریس مزید مضبوط ہوگی۔
اس موقع پر ضلع سوشل میڈیا کانگریس پارٹی کے صدر محمد ذیشان بارہ بنکی کے ایم پی ہاؤس پہنچے اور محمد محسن کو گلدستہ پیش کرکے دلی مبارکباد دی۔ محمد ذیشان نے کہا کہ محمد محسن کی قیادت میں کانگریس کا تنظیمی ڈھانچہ مزید مستحکم ہوگا اور کارکنان کو نیا حوصلہ ملے گا۔ انہوں نے کہا کہ محمد محسن ایک متحرک اور تجربہ کار لیڈر ہیں، جنہوں نے ہمیشہ پارٹی کی مضبوطی کے لیے انتھک محنت کی ہے۔
انہوں نے مزید کہا کہ موجودہ سیاسی حالات میں کانگریس کو ایک مضبوط قیادت کی ضرورت ہے، اور محمد محسن جیسے سینئر اور مخلص رہنما کے دوبارہ صدر منتخب ہونے سے کارکنان میں نیا اعتماد پیدا ہوگا۔ انہوں نے یقین ظاہر کیا کہ محسن کی رہنمائی میں بارہ بنکی کانگریس نئی بلندیوں کو چھوئے گی اور پارٹی کے اثر و رسوخ میں مزید اضافہ ہوگا۔
اس موقع پر کئی سینئر کانگریسی رہنما اور کارکنان بھی موجود تھے، جنہوں نے محمد محسن کی قیادت پر مکمل اعتماد کا اظہار کیا اور تنظیم کو مزید فعال و مضبوط بنانے کے عزم کا اعادہ کیا۔ شرکاء نے کہا کہ آنے والے انتخابات میں کانگریس کو کامیابی دلانے کے لیے وہ متحد ہو کر کام کریں گے اور پارٹی کے نظریات کو عوام تک پہنچانے میں کوئی کسر نہیں چھوڑیں گے۔
