کانپور (محمد عثمان قریشی) جمعیۃ علماء شہر و مجلس تحفظ ختم نبوت کی جانب سے جامع مسجد اشرف آباد جاجمؤ اور پرانا کانپور میں استقبال رمضان و تفہیم دین پروگرام میں مولانا خلیل احمد مظاہری نے کہا کہ ماہر شریعت کی رہنمائی میں عمل کرنے کا نام تقلید ہے. پروگرام میں مولانا امین الحق عبداللہ قاسمی، مولانا محمد انیس خاں قاسمی، مولانا خلیل احمد مظاہری، مفتی سعد نور قاسمی اور مولانا امیر حمزہ قاسمی کے خطابات ہوئے۔
جامع مسجد اشرف آباد میں خطاب کرتے ہوئے مولانا خلیل احمد مظاہری نے دین اسلام کی بنیاد اور احکام و مسائل کے ماخذ کی تفصیل بیان کی۔ انہوں نے کہا کہ شریعت میں اجتہاد و تقلید ایک اہم ضرورت ہے جس کے بغیر دین مکمل نہیں ہوسکتا۔ تقلید دراصل قرآن و سنت پر ہی عمل کرنے کا نام ہے جو کسی ماہر شریعت کی رہنمائی میں انجام دیا جاتا ہے۔
مولانا امین الحق عبداللہ قاسمی نے اشرف آباد اور پرانا کانپور کے خطابات میں کہا کہ جن واسطوں سے ہمیں دین ملا ہے ان پر اعتماد کرنا نہایت ضروری ہے، اگر کسی ایک واسطے کو بھی مجروح کرنے کی کوشش کی جائے گی دین کی بنیاد کمزور ہوجائے گی، اس واسطے میں صحابہ کرام بنیاد کے پتھر کی حیثیت رکھتے ہیں، اور ان کے بعد تابعین، تبع تابعین، ائمہ مجتہدین، فقہاء اور آج کے علماء و مفتیان سب شامل ہیں۔
مفتی سعد نور قاسمی نے کہا کہ رمضان نیکیوں کے سیزن کا مہینہ ہے۔ فرائض و واجبات کے علاوہ کثرت سے نوافل کا اہتمام، تلاوت کی کثرت، درود، ذکر، استغفار، دعا اور دیگر تسبیحات، تہجد و اشراق اور گناہوں سے بچنا رمضان کے حصول کا بہترین ذریعہ ہے۔
مولانا امیر حمزہ قاسمی نے اشرف آباد میں نوجوانوں کے سوالات کے تشفی بخش جوابات دئیے۔ سوالات میں فقہ، حدیث، سنت، اجتہاد، تقلید، دعوت، اور رمضان اور روزہ وغیرہ جیسے موضوعات شامل رہے۔ ذہن و دماغ میں موجود سوالات کے تفصیلی جوابات ملنے پر نوجوانوں نے اطمینان کا اظہار کیا اور اس پروگرام کو سال میں متعدد مرتبہ منعقد کیے جانے کی فرمائش کی۔ سوالات و جوابات کا یہ سلسلہ رات گیارہ بجے کے بعد تک جاری رہا۔
