کانپور |محمد عثمان قریشی |محکمہ شرعیہ و دارالقضاء واقع جمعیۃ بلڈنگ رجبی روڈ کی انتظامیہ نے اعلان کیا ہے کہ رمضان المبارک کے مقدس مہینے میں بھی محکمہ شرعیہ اور دارالقضاء اپنی خدمات بدستور جاری رکھے گا اور عوام کو شرعی و عائلی مسائل میں مکمل رہنمائی فراہم کرتا رہے گا۔
محکمہ شرعیہ و دارالقضاء کانپور کے صدر مفتی عبد الرشید قاسمی اور جنرل سکریٹری مولانا امین الحق عبداللہ قاسمی نے وضاحت کی کہ نکاح، طلاق، خلع، وراثت، مالی تنازعات اور دیگر شرعی معاملات کے حل کے لیے دارالقضاء میں علماء کرام اور ماہر قاضی صاحبان کی نگرانی میں فیصلے سنائے جاتے رہیں گے، تاکہ عوام کو شرعی اصولوں کے مطابق ان کے حقوق دلائے جا سکیں۔
محکمہ کے قاضی مولانا انعام اللہ قاسمی نے عوام الناس کو مطلع کیا کہ رمضان المبارک میں دارالقضاء کے اوقات کار میں کوئی تبدیلی نہیں کی گئی ہے اور تمام شرعی خدمات معمول کے مطابق جاری رہیں گی۔ دارالقضاء روزانہ دوپہر 2 بجے سے شام 4 بجے تک کھلا رہے گا، جبکہ جمعہ کو تعطیل ہوگی۔ اتوار کے دن عوام کی سہولت کے لیے صبح 10 بجے سے دوپہر 1 بجے تک خدمات فراہم کی جائیں گی۔ مزید برآں، روزہ داروں کی سہولت کے پیش نظر مقدمات اور مشاورت کے امور کو جلد از جلد نمٹانے کی کوشش کی جائے گی، تاکہ کسی کو غیر ضروری پریشانی کا سامنا نہ ہو۔ انہوں نے بتایا کہ 20 رمضان تک یہ خدمات جاری رہیں گی، پھر عید کے بعد یہ نظام جاری ہوگا۔
محکمہ شرعیہ و دارالقضاء کانپور کے ذمہ داران نے عوام سے اپیل کی کہ وہ اپنے شرعی و عائلی معاملات کو قرآن و سنت کی روشنی میں حل کرانے کے لیے دارالقضاء سے رجوع کریں۔
دارالقضاء کا بنیادی مقصد اسلامی تعلیمات کے مطابق تنازعات کا منصفانہ حل اور شرعی رہنمائی فراہم کرنا ہے، تاکہ مسلمانوں کی زندگی میں عدل و انصاف کا نظام مضبوط ہو سکے۔
