مسابقہ حفظ کے رجسٹریشن کی آخری تاریخیں قریب، جلد فارم جمع کرنے کی اپیل

کانپور (محمد عثمان قریشی) شہری جمعیۃ علماء کانپور کے زیر اہتمام ہونے والے 100/سالہ قدیمی، تاریخی و مرکزی سہ روزہ اجلاس معراج النبیؐ کے موقع پر مسابقہ حفظ قرآن کریم کا انعقاد کیا جارہا ہے۔ مسابقہ میں حصہ لینے کیلئے اصول و ضوابط اور رجسٹریشن فارم شائع کیا جاچکا ہے۔ رجسٹریشن کی آخری تاریخ5/دسمبر طے کی گئی ہے۔ مسابقہ کے کنوینر مفتی سید محمد عثمان قاسمی نے اس کی اطلاع دیتے ہوئے جلد فارم جمع کرنے کی اپیل کی ہے۔
انہوں نے بتلایا کہ مسابقہ میں حصہ لینے کیلئے کم از کم 10/ پاروں کا حافظ ہونا اور 15/ سال یا اس کم عمر کا ہونا شرط ہے۔ فارم جمع کرنے کیلئے شہر کے مختلف علاقوں میں ذمہ دار متعین کیے گئے ہیں جس میں جمعیۃ بلڈنگ رجبی روڈ میں مولانا ایاز ثاقبی، مسجد نور پٹکاپور میں مفتی اظہار مکرم قاسمی، کرنیل گنج میں مفتی محمد دانش قاسمی، چمن گنج میں مولانا محمد حذیفہ قاسمی، تلک نگر اور پرانا کانپور میں مولانا سعد خان ندوی، کاکادیو میں محمد شاہد، بابوپوروہ و اطراف میں مولانا انصار احمد جامعی، رمئی پور میں قاری جنید احمد، میرپور و اطراف میں مفتی واصف قاسمی، اشرف آباد جاجمؤ میں مولانا عبدالعظیم قاسمی کے پاس فارم جمع کیے جاسکتے ہیں۔
انہوں نے بتلایا کہ مسابقہ میں اول پوزیشن لانے والے کو عمرہ کرایا جائے گا جبکہ دوسری پوزیشن والے کو 31000/روپئے نقد اور تیسری پوزیشن والے کو 21000/ نقد بطور انعام دیا جائے گا۔