لکھنٶ(ابوشحمہ انصاری) اترپردیش کے سابق کارگزار وزیر اعلیٰ اور آل انڈیا مائنارٹیز فورم فار ڈیموکریسی کے قومی صدر ڈاکٹر عمار رضوی نے آپریشن سندور کی کامیابی پر وزیر اعظم، وزیر دفاع، وزیر داخلہ اور قومی سلامتی مشیر کو دل کی گہرائیوں سے مبارکباد پیش کی ہے۔
ڈاکٹر رضوی نے اپنے پیغام میں کہا کہ اس فوجی کارروائی نے دنیا بھر کے دہشت گرد تنظیموں کو ایک سخت پیغام دیا ہے کہ بھارت”وسدھویکوٹمبکم” (ساری دنیا ایک کنبہ ہے) کے نظریے پر پختہ یقین رکھتا ہے، لیکن وہ اپنی علاقائی سالمیت، خودمختاری اور اپنے عوام کی سلامتی پر کبھی سمجھوتہ نہیں کرے گا۔
دنیا کو یہ جان لینا چاہیے کہ ہم پُرامن اور منکسرالمزاج قوم ہیں، لیکن ہم کمزور نہیں ہیں۔ ہم باصلاحیت اور طاقتور ہیں اور ہر چیلنج کا مقابلہ کرنے کی بھرپور صلاحیت رکھتے ہیں۔
ماضی میں بھی ہم نے پاکستان کو ہر جارحیت کا مؤثر جواب دیا ہے۔ افسوس کی بات ہے کہ حقیقی آزادی اور خودمختاری اب بھی پاکستان سے کوسوں دور ہے، جہاں ہمیشہ سے فوجی حکمرانوں کا غلبہ رہا ہے۔ جمہوری قوتوں کو وہاں اکثر فوجی سربراہوں نے دبایا ہے۔
میں اپنی مسلح افواج کو آپریشن سندور اور ان کی جرأت اور بہادری پر بھی مبارکباد پیش کرتا ہوں۔ ہماری فوج ہر صورتِ حال سے نمٹنے کی مکمل صلاحیت رکھتی ہے۔
بھارت نے دنیا کو یہ ثابت کر دیا ہے کہ وہ جمہوریت اور آئین کے پرچم تلے ایک قوم، ایک عوام اور ایک ملک ہے۔ دنیا کی کوئی طاقت ہمارے بہادر عوام اور ہماری مسلح افواج کو خوف زدہ نہیں کر سکتی۔
