بارہ بنکی، (ابوشحمہ انصاری)سعادت گنج کی بہت ہی فعال ادبی تنظیم "بزم ایوانِ غزل” کے زیرِ اہتمام ایک عظیم الشان محفلِ مسالمہ کا انعقاد عمل میں آیا اس بہت ہی کامیاب مسالمے کی صدارت استاد شاعر اور زائرِ کربلائے معلٰی الحاج نصیر انصاری نے کی جبکہ اس میں مہمانِ خصوصی کی حیثیت سے عدیل منصوری اور مہمانِ ذی وقار کے طور پر عاصی چوکھنڈوی نے شرکت فرمائی۔
اس بے پناہ کامیاب تر مسالمے کی نظامت کے فرائض آفتاب جامی نے اپنے منفرد، مخصوص اور البیلے انداز میں انجام فرمائے اس محفلِ مسالمہ کی ابتداء مشتاق بزمی نے نعتِ رسولﷺ سے کی، مسالمے میں بہت زیادہ پسند کئے گئے اشعار کا انتخاب نذرِ قارئین ہے ملاحظہ فرمائیں۔
تجھ پہ نازاں ہیں بہاریں خلد کی
کربلا تیری بہاروں کو سلام
نصیر انصاری
جنگ کے نام سے کربل میں ہوا ظلم فقط
جنگ ہوتی تو پھر اصغر نہیں مارے جاتے
ذکی طارق بارہ بنکوی
شہید ہوگیا کنبہ حسین کا پورا
حسینیت کا مگر اس سے خاتمہ نہ ہوا
عدیل منصوری
میں نے روکا جو تھا آپ کا راستہ
سر ہے حاضر مرا اے مرے بادشاہ
صبح کا بھولا میں شام کو آگیا
اب خطا بخش دو میرے آقا حسین
عاصی چوکھنڈوی
اب تو ہے قیامت تک امتِ محمد کا
تو ہی پیشوا شبیر تو ہی رہنما شبیر
مشتاق بزمی
نانا کی پشتِ پاک پہ جو کھیلتا رہا
اے کربلا ہے گود میں تیری وہی حسین
اسلم سیدنپوری
اگر تم غور سے کرب و بلا کی داستاں سنتے
تمہارے ہوش اڑ جاتے کلیجہ منھ کو آ جاتا
راشد رفیق
تمہیں بتائیں کہ محشر کے روز کیا ہوگا
جدھر حسین رہیں گے ادھر خدا ہوگا
آفتاب جامی
دینِ نبی کی شان بڑھانے کے واسطے
خنجر کے نیچے اپنا گلا کر گئے حسین
ظہیر سیدنپوری
آپ کے اک آخری سجدے نے واضح کر دیا
ساری دنیا کی نمازوں پر ہے احسانِ حسین
عبید عزمی
اپنے سینے سے لگا لوں اور ادب سے چوم لوں
آپ کے در کی جو تھوڑی خاک مل جائے حسین
سحر ایوبی
سوا حسین کے کوئی نہ ذکر ہوگا اب
زباں ہے وقف مری ذکرِ کربلا کے لئے
نعیم سکندر پوری
نامِ یزید مٹ گیا دنیا سے دوستو
سب کے دلوں میں آج بھی زندہ حسین ہے
عاصم اقدس
خدا کی شان اسے موت بھی نہ مار سکی
جہاں میں آج بھی میرا حسین زندہ ہے
ابوذر انصاری
ان شعراء کے علاوہ مصباح رحمانی، اظہار حیات، ارشد عمیر صفدر گنجوی اور طالب نور نے بھی اپنا اپنا کلام بطور نذرانہء عقیدت بارگاہِ حسینؓ میں پیش کیا اس محفلِ مسالمہ میں سامعین میں ماسٹر محمد وسیم، ماسٹر محمد قسیم، ماسٹر محمد حلیم اور ماسٹر محمد راشد نے نام بھی قابلِ ذکر ہیں مسالمے کے مکمل ہونے پر "بزمِ ایوانِ غزل” کے صدر ذکی طارق بارہ بنکوی نے مسالمے میں شرکت کرنے والے تمام شعراء اور سامعین کا شکریہ ادا کیا۔
