آصف جمیل امجدی
الحمد للہ! رجب المرجب کا بابرکت چاند طلوع ہو چکا ہے، اور یہ مہینہ اپنے ساتھ بے شمار رحمتیں، برکتیں، اور فضیلتیں لے کر آیا ہے۔ اسلامی تقویم کا ساتواں مہینہ، جسے رجب المرجب کہا جاتا ہے، اپنے نام کی خاص وجہ تسمیہ رکھتا ہے۔ "رجب” لفظ "ترجیب” سے ماخوذ ہے، جس کا مطلب تعظیم اور بزرگی ہے۔
رجب حرمت والا مہینہ:
رجب المرجب ان چار حرمت والے مہینوں میں شامل ہے جنہیں اللہ تعالیٰ نے خاص عزت و تکریم عطا فرمائی ہے۔ قبل از اسلام بھی یہ مہینہ جدال و قتال سے پاک تھا، اور اس مہینے میں ہتھیاروں کی آوازیں سنائی نہ دیتی تھیں، اس لیے اسے "رجب الاصم” کہا جاتا تھا۔ اس کے علاوہ، اس ماہ کو "رجب الاصب” بھی کہا جاتا ہے کیونکہ اللہ تعالیٰ اس ماہ میں اپنی رحمتوں اور بخششوں کو اپنے بندوں پر خاص طور پر نازل فرماتا ہے۔
عبادت اور دعاؤں کی قبولیت کا موسم:
رجب شریف کا مہینہ بندگانِ خدا کے لیے عبادات، دعاؤں، اور تقربِ الٰہی کا خاص موقع فراہم کرتا ہے۔ اس ماہ میں عبادات کے درجات بلند ہوتے ہیں اور دعائیں مستجاب ہوتی ہیں۔ ایک حدیث مبارکہ کے مطابق:
"رجب کے پہلے دن کا روزہ تین سال کے گناہوں کا کفارہ ہے، دوسرے دن کا روزہ دو سال کے گناہوں کا، اور تیسرے دن کا روزہ ایک سال کے گناہوں کا کفارہ ہے۔ پھر ہر دن کا روزہ ایک مہینے کے گناہوں کا کفارہ بنتا ہے۔”
(الجامع الصغیر، حدیث نمبر 7948)
واقعۂ معراج النبی ﷺ:
رجب المرجب کی ستائیس تاریخ کو وہ عظیم اور بے مثال واقعہ پیش آیا جس نے اسلامی تاریخ کو ایک نئی روشنی عطا کی۔ اس رات اللہ تعالیٰ نے اپنے محبوب ﷺ کو معراج کا شرف بخشا، آسمانوں کی سیر کرائی، اور قربِ الٰہی کا اعلیٰ مقام عطا کیا۔ یہ واقعہ انسانیت کے لیے ایمان، یقین، اور قربانی کی بے نظیر مثال ہے۔
فتح بیت المقدس سلطان صلاح الدین ایوبی کا کارنامہ:
اسلامی تاریخ کا ایک اور عظیم واقعہ ماہِ رجب میں پیش آیا۔ سن 583 ہجری (1187 عیسوی) میں سلطان صلاح الدین ایوبی نے بیت المقدس کو فتح کیا اور مسلمانوں کے ساتھ مسجد اقصیٰ میں فاتحانہ شان کے ساتھ داخل ہو کر سجدۂ شکر ادا کیا۔ یہ فتح اسلامی غیرت و حمیت کا وہ باب ہے جو ہمیشہ سنہری حروف میں لکھا جائے گا۔
نتیجہ عظمتِ رجب کا درس:
ماہِ رجب ہمیں اللہ تعالیٰ کی قربت، بندگی، اور نیکیوں کے راستے پر چلنے کی ترغیب دیتا ہے۔ یہ مہینہ ایک ایسا موقع ہے جس میں ہمیں اپنے اعمال کو سنوارنے، گناہوں سے توبہ کرنے، اور اپنے رب کی رضا کے حصول کی کوشش کرنی چاہیے۔
