مدرسہ جامع العلوم جامع مسجد پٹکاپور کے زیر اہتمام تقریب یوم جمہوریہ کا انعقاد
کانپور (محمد عثمان قریشی) ملک اور شہر کی معروف قدیم دینی تعلیمی درسگاہ مدرسہ جامع العلوم جامع مسجد پٹکاپور کے زیر اہتمام یوم جمہوریہ کے موقع پر تقریب منعقدکی گئی۔ جس میں مدرسہ کے اساتذہ نے مشترکہ طور پر پرچم کشائی کی۔ تقریب کا آغاز تلاوت قرآن پاک سے کیا گیا۔ طلباء نے حب الوطنی کے جذبہ سے سرشار تقریریں، نظمیں اور دیگر پروگرام پیش کئے۔
مفتی محمد معاذ قاسمی نے اس موقع پر ملک کے عوام کو مدرسہ کی جانب سے پیغام دیتے ہوئے کہا کہ ہم تمام باشندگان وطن اپنے ملک کے آئین کو پڑھیں، ملک کے تئیں اپنی ذمہ داریوں کو ادا کریں اور بیدار رہتے ہوئے اپنے حقوق کو پہچاننے والے بنیں۔
مفتی محمد امیر اللہ قاسمی نے نظامت کے فرائض انجام دئے۔ اس موقع پر مدرسہ کے تمام طلباء، اساتذہ کے ساتھ کثیر تعداد میں علاقائی عوام موجود تھے۔
