بارہ بنکی (ابوشحمہ انصاری) بارہ بنکی کے معروف ادارہ مدرسہ جامعہ مدینۃ العلوم رسولی کے سینئر استاد مولانا محمدارشدقاسمی کے لئے الوداعی تقریب کا انعقاد کیا گیا۔ جس میں جامعہ کے تمام اساتذہ کے علاوہ دیگر محبین جامعہ موجود رہے۔
سبھی حاضرین نے گلپوشی کے ساتھ ان کو گلدستہ پیش کیا۔ واضح رہے گزشتہ 31 مارچ 2025 کو مولانا موصوف سبکدوش ہوگئے تھے۔ انہوں نے 39 سالوں تک جامعہ میں تدریسی خدمات انجام دیں۔ اس موقع پر مینیجر جامعہ حافظ ایازاحمد مدینی نے کہا مولانا نے ہمارے والدمحترم و سابق صدرالمدرسین مرحوم مولانا معراج احمد کے دست راست تھے۔
انہوں نے جامعہ کو ترقی کی بلندیوں تک پہونچانے میں اپنا بڑا کردار نبھایا ہے۔
انہوں نے جامعہ کو ترقی کی بلندیوں تک پہونچانے میں اپنا بڑا کردار نبھایا ہے۔ جامعہ کے لئے ان کی قربانیوں کو کبھی فراموش نہیں کیا جاسکتا۔ جامعہ کے ہر شعبہ پر ان کی بڑی گہری نظر رہتی تھی۔ وقتاً فوقتاً ہماری رہنمائی اور جامعہ کی تعمیر و ترقی کے لئے اپنے مفید مشوروں سے نوازنا ہمارے لئے توانائی کا کام کرتا تھا۔
پرنسپل جامعہ مولانا مقبول احمدقاسمی نے کہا مولانا میرے استاد بھی ہیں۔ میں نے ان سے علمی استفادہ کیا ہے۔ مولانا کا جامعہ سے پچھلے 46 سالوں سے بڑا گہرا ربط رہا ہے۔ فراغت کے بعد ہی سے تدریسی خدمات انجام دینے کے لئے ان کا تقرر کرلیا گیا تھا۔
مولانا محمدارشدقاسمی نے اپنی تقریر میں کہا کہ ہم نے اس ادارہ کی تعمیر و ترقی میں کوئی کسر باقی نہ چھوڑی۔ ہم نے طلبہ کی تعلیم و تربیت کی خاطر رات و دن جامعہ کو سونپ رکھے تھے۔ ہمارا اس ادارے سے بڑا جذباتی تعلق ہے۔ یہیں رہنا اور یہیں پر درس و تدریس کا سلسلہ قائم رکھنا ہمارا مستقل مزاج بن گیا تھا۔ مسلسل جامعہ میں قیام پزیر ہونے اور زیادہ گھر جانے آنے کا سلسلہ نہ ہونے کی وجہ سے ہمارے والدین بھی ہم سے یہیں ملاقات کے لئے آیا کرتے تھے۔
تقریب میں موجود جامعہ کے تمام اساتذہ بشمول مینیجر و پرنسپل نے خواہش ظاہر کی کہ مولانا بقیہ اپنی پوری زندگی اسی ادارہ کو اپنی خدمات سے نوازتے رہیں۔ اس موقع جامعہ کے تمام معلمین و معلمات میں خصوصاً مولانا عقیل احمد ، ماسٹرعبدالماجد، مولانا محمد وسیم، مبین احمد ، محمد سرتاج کلو ، ماسٹر معز عثمانی، عمر جمال، محمداسرار قریشی، حاجی محمد طفیل، محمدسلمان ، حاجی ملا سراج احمدراعین ، مجیب الدین ، مولانا حیات قاسمی ، ماسٹرمحمدشبیر ، مولانا اخلاق ندوی کے علاوہ درجنوں لوگ موجود رہے۔
