لکھنٶ(ابوشحمہ انصاری) اتر پردیش کے سابق کارگزار وزیر اعلیٰ اور سینئر سیاست داں، ڈاکٹر عمار رضوی نے آج نیمش کے اتی وشِشٹ گیسٹ ہاؤس (انتہائی معزز مہمان خانہ) میں راجیہ سبھا کے رکن اور بھارتیہ جنتا پارٹی کے قومی نائب صدر، لکشمی کانت واجپئی سے ایک اہم ملاقات کی۔
اس موقع پر کئی معزز شخصیات شریک رہیں، جن میں بھارتیہ جنتا پارٹی کے دیگر سینئر رہنما و کالی چرن کالج کے صابق پرنسپل وی این مشرا بھی شامل تھے۔
راجیہ سبھا رکن کے ساتھ یہ ملاقات نہایت خوشگوار اور تعمیری ماحول میں منعقد ہوئی، جس میں اتر پردیش کی موجودہ سیاسی صورتحال، عوامی فلاح و بہبود، اور ریاست میں ترقیاتی امور سے متعلق کئی اہم موضوعات پر تفصیلی تبادلہ خیال کیا گیا۔ دونوں رہنماؤں نے ریاست کے مستقبل، ترقیاتی پالیسیوں اور امن و استحکام کے فروغ پر بھی اپنے خیالات کا اظہار کیا۔
ڈاکٹر عمار رضوی نے لکشمی کانت واجپئی کو نو تعمیر شدہ عالمی امن مرکز، محمود آباد کے افتتاحی موقع پر بطور مہمان خصوصی محمود آباد تشریف لانے کی دعوت دی۔ لکشمی کانت واجپئی نے اس مرکز کے قیام کو ایک مثبت اور تعمیری قدم قرار دیا، جو بین المذاہب ہم آہنگی اور سماجی استحکام کے لیے معاون ثابت ہوگا۔
یہ ملاقات سیاسی اور سماجی امور پر تبادلہ خیال کے لیے ایک اہم پیش رفت ثابت ہوئی، جس نے ریاست میں امن، ہم آہنگی اور ترقی کے مشترکہ مقاصد کے لیے مختلف رہنماؤں کے درمیان باہمی تعاون کے امکانات کو مزید مستحکم کیا۔
یہ بات یقیناً خوش آئند ہے کہ اس طرح کی ملاقاتیں ریاستی ترقی اور عوامی مفاد میں سود مند ثابت ہوں گی، اور باہمی مشاورت سے ایسے فیصلے لیے جائیں گے جو نہ صرف اتر پردیش بلکہ پورے ملک کے لیے فائدہ مند ہوں گے۔
