کانپور(محمد عثمان قریشی) مشرقی اترپردیش کے ممتاز دینی ادارے “جامعہ محمودیہ اشرف العلوم، جامع مسجد اشرف آباد، جاجمؤ، کانپور” نے تعلیمی سال 1446ھ بمطابق 2025ء کے لیے داخلوں کا باقاعدہ اعلان کر دیا ہے۔ ادارہ کے مطابق ناظرہ، حفظِ قرآن کریم، دینیات اور فارسی تا ہفتم (مشکوٰۃ شریف) تک تمام درجات میں دارالعلوم دیوبند کے نصاب کے مطابق تعلیم دی جاتی ہے، اور اسی کے تحت نئے تعلیمی سال میں داخلے کیے جائیں گے۔
داخلہ فارم کی تقسیم کا آغاز 12 اپریل 2025ء سے کیا گیا ہے۔ قدیم طلبہ کے لیے داخلے کی آخری تاریخ 17 اپریل مقرر کی گئی ہے، جبکہ نئے طلبہ کے لیے 21 اپریل تک وقت طے کیا گیا ہے۔ تمام درجات، خواہ جدید ہوں یا قدیم، کے داخلے ایک ساتھ شروع کیے جائیں گے، البتہ قدیم طلبہ کے داخلے ترجیحی بنیادوں پر پہلے مکمل کیے جائیں گے۔
ادارے نے داخلہ خواہاں طلبہ اور ان کے سرپرستوں کے لیے چند ضروری ہدایات جاری کی ہیں۔ ہر نئے طالب علم کے لیے دو عدد پاسپورٹ سائز تصاویر، آدھار کارڈ، والدین یا سرپرست کا آدھار کارڈ، اور سابقہ مدرسے کا کوئی تحریری ثبوت لانا لازمی ہوگا۔ مزید برآں، نئے داخلے کے وقت والدین یا سرپرست کی موجودگی بھی ضروری قرار دی گئی ہے تاکہ انہیں ادارے کے تعلیمی، اخلاقی اور تربیتی نظم و ضبط سے آگاہ کیا جا سکے۔
جامعہ میں دینی تعلیم کے ساتھ ساتھ معیاری طعام، قیام اور طبی سہولیات کا بھی مکمل انتظام موجود ہے۔ اس کے علاوہ طلبہ کی عصری تعلیمی ضروریات کو مدنظر رکھتے ہوئے حفظ و ناظرہ کے ساتھ پانچویں جماعت (5th کلاس) تک اسکولی تعلیم کا نظم بھی کیا گیا ہے۔ خواہش مند طلبہ کو NIOS کے ذریعے ہائی اسکول اور انٹرمیڈیٹ کے امتحانات میں شرکت کی سہولت دی جاتی ہے، تاکہ وہ دینی اور عصری تعلیم کو یکجا کر سکیں۔
جامعہ اشرف العلوم کے ناظم مولانا امین الحق عبداللہ قاسمی اور ناظم تعلیمات مفتی سید محمد عثمان قاسمی نے والدین سے اپیل کی ہے کہ وہ اپنے بچوں کے داخلے جلد از جلد مکمل کروا کر ان کے روشن دینی و دنیاوی مستقبل کی بنیاد رکھیں۔ مزید معلومات اور داخلہ فارم کے حصول کے لیے 9839848686 یا 8423779585 پر رابطہ کیا جا سکتا ہے۔
