کانپور ( محمد عثمان) پہلگام حملے میں بے گناہوں کے قتل اور دہشت گردی کے افسوسناک واقعے کے خلاف آج اقصیٰ جامع مسجد، گدیانہ سے پُرامن احتجاجی جلوس آل انڈیا غریب نواز کونسل کے زیر اہتمام نکالا گیا،جس میں
مظاہرین نے کالا عمامہ اور کالی پٹی باندھ کر دہشت گردانہ واقعہ کی پرزور مخالفت کی۔
مظاہرین کے ہاتھوں میں تختیاں تھیں جن پر درج تھا "دہشت گردی مردہ آباد ،آتنک واد مردہ آباد ،ہندوستان زندہ آباد ،انسانیت زندہ آباد ،مانوتا زندہ آباد، آتنک واد کو سزا دو سزا دو،ناحق خون بہانے والوں کو سزا دو سزا دو، بھارت کے دشمنوں سے بدلہ لو بدلہ لو۔
لوگوں نے ان نعروں کے ذریعے نہ صرف دہشت گردی کے خلاف غم و غصے کا اظہار کیا بلکہ اس شیطانی حرکت پرگہرے افسوس کا اظہار کیا۔ اس موقع مولانا محمد ہاشم اشرفی نے دہشت گردی کی سخت مذمت کرتے ہوئے قرآن کا حوالہ دے کر کہا کہ کوئی بھی دہشت گرد اسلام کا وفادار نہیں ہو سکتا، جو کسی ایک جان کو ناحق قتل کرے، گویا اس نے پوری انسانیت کو قتل کیا۔”
انھوں نے مزید کہا کہ ہماری ہمدردیاں ان مظلوم لوگوں کے ساتھ ہیں جو اس واقعے میں شہید ہوئے یا زخمی ہوئے۔ ہم ان کے والدین اور بچوں کے ساتھ اظہار غم کرتے ہیں۔ یہ دہشت گردی انسانیت کے خلاف جرم ہے۔ حکومت ہند ایسے ظالموں کو پھانسی کی سزا دے کر کیفر کردار تک پہنچائے اور انھیں ایسی سخت سزا دی جائے کہ آئندہ کوئی بھی ملک میں دہشت پھیلانے کی جراءت نہ کر سکے
کالا عمامہ اور کالی پٹیوں کے ساتھ جلوس میں مقامی سماجی و تعلیمی شخصیات کے علاوہ شفیق احمد،حاجی حیدر علی،شمشاد غازی،مولانا اجمیر الدین،حافظ منہاج الدین قادری،ارمان خان ،حافظ منہاج الدین قادری،محمد ادریس خان،شا کر علی ،حنیف بھائی ،قمر علی سمیت سیکڑوں لوگوں نے شرکت کی جن میں تمام افراد نے ایک ہی آواز میں کہایہ جلوس صرف ایک احتجاج نہیں، بلکہ ایک پیغام ہےکہ ہم دہشت گردی کے خلاف ہیں، انسانیت کے ساتھ ہیں، اور اسلام کا دامن سراپا امن و انصاف سے بھرا ہوا ہے
جلوس کا اختتام زخمیوں کے لیے شفا،مرنے والوں کے لیے غم،دہشت گردی کے خاتمے ،ملک میں امن و امان ،ترقّی ،خوش حالی،آپسی بھائی چارے اور محبت کے لیے دعا پر ہوا
