کانپور (محمد عثمان قریشی) موجودہ زمانے میں جب کہ سائنسی ترقی اور عصری تعلیم کی دوڑ میں بچے دینی شعور، اخلاقی تربیت، اور روحانی اقدار سے دور ہوتے جا رہے ہیں، ایسے ماحول میں اسکولی طلبہ کو مسجد و مدرسہ سے جوڑنا وقت کی ایک اہم دینی و تعلیمی ضرورت بن چکی ہے۔ اسی مقصد کے تحت جامعہ محمودیہ اشرف العلوم، جامع مسجد اشرف آباد، جاجمؤ کانپور کی علمی و فکری شاخ متین الحق اکیڈمی کے زیر اہتمام پانچویں جماعت سے انٹرمیڈیٹ تک کے اسکولی بچوں کے لیے ایک ہمہ گیر تین روزہ دینی سمر کیمپ کا انعقاد کیا جا رہا ہے۔ یہ کیمپ 30، 31 مئی اور یکم جون 2025 (جمعہ، سنیچر، اتوار) کو جامع مسجد اشرف آباد کے پاکیزہ اور دینی ماحول میں منعقد ہوگا
اس کی اطلاع دیتے ہوئے جامعہ کے ناظم مولانا امین الحق عبداللہ قاسمی نے بتلایا کہ اس کیمپ میں شریک طلبہ کو تین دن مسجد و مدرسہ کے نظم و ضبط کے ساتھ رکھا جائے گا، جہاں ان کی تربیت دینی بنیادوں پر کی جائے گی۔ ان سیشنز میں عقائد (ایمانیات)، عبادات، طہارت و نماز کے مسائل، معاملات و معاشرت، والدین اور اہل خانہ کے حقوق، سیرت نبوی کے منتخب واقعات، اخلاقی اصول، اور ایک اچھا انسان اور باعمل مسلمان بننے کے بنیادی گر سکھائے جائیں گے۔ تدریس کا انداز انٹرایکٹو اور دلچسپ ہوگا، تاکہ بچے دین کو محبت اور فہم کے ساتھ سیکھیں۔
کیمپ کے اغراض و مقاصد بیان کرتے ہوئے مولانا نے کہا کہ بچوں کو دینی ماحول سے روشناس کرانا، ان کے اندر اخلاقی بصیرت پیدا کرنا، اور انہیں سماج و ملت کے لیے مفید فرد بنانے کی عملی بنیاد رکھنا ہے۔ ہر دن کا آغاز قرآن کی تلاوت، اذکار اور تربیتی گفتگو سے ہوگا، اور اختتام ہلکے پھلکے دینی مسابقات، سوال و جواب اور اخلاقی کہانیوں پر ہوگا۔ اس دوران طلبہ کے معمولات کی نگرانی اور ان کی دلچسپی کو برقرار رکھنے کے لیے تربیت یافتہ اساتذہ اور معاونین کی ٹیم ہمہ وقت موجود رہے گی۔
سہ روزہ کیمپ کے کنوینر مولانا حذیفہ قاسمی نے بتلایا کہ کیمپ کے لیے رجسٹریشن کا عمل جاری ہے اور نشستیں محدود ہیں۔ والدین، سرپرست حضرات، اور تعلیمی فکر رکھنے والے افراد سے گزارش ہے کہ وہ 6386850526, 9696314272, 8953015514 نمبرات پر اپنے بچوں کا بر وقت اندراج کرائیں اور نئی نسل کی دینی، فکری اور اخلاقی تربیت کے اس مبارک سفر کا حصہ بنیں۔
واضح رہے کہ متین الحق اکیڈمی کی جانب سے اس سے قبل گزشتہ سال کا دو روزہ سمر کیمپ اور جنوری ۲۰۲۵ میں تین روزہ ونٹر کیمپ بھی نہایت کامیابی سے منعقد ہوچکے ہیں، جنہیں والدین، تعلیم یافتہ طبقے اور سماجی حلقوں میں بے حد پذیرائی حاصل ہوئی تھی۔ انہی کامیاب تجربات کو سامنے رکھتے ہوئے اس بار کے سمر کیمپ کو مزید بہتر، بامقصد اور مؤثر بنانے کی کوشش کی جا رہی ہے۔
