کانپور (محمد عثمان قریشی) آج سیسہ مئو رین بسیرا ہال میں سرو کلیانی سنستھان کے زیر اہتمام کنگ آف فالکنس ایجوکیشن انسٹیٹیوٹ کے 13 ویں یوم تاسیس پر ایک شاندار پروگرام کا انعقاد کیا گیا جس میں انسٹیٹیوٹ کے ذہین بچوں کو امتیازی نمبر حاصل کرنے پر اعزاز سے نوازا گیا.
پروگرام کا آغاز تلاوت کلام پاک سے ہوا نعت شریف کے بعد بچوں نے ثقافتی پروگرام پیش کئے ، اس موقع پر سنستھان کے صدر تکمیل حسن اور جنرل سیکرٹری شہباز خان نے بتایا کہ سوسائٹی ایجوکیشن اور فلاح عام کے مختلف پروگرام منعقد کر رہی ہے جس میں 13 سالوں میں بہت کامیابی حاصل ہوئی ہے.
انہوں نے کہا کہ ہمارا مقصد ہے کہ ہم آپ سب کے تعاون سے ایک ایسا اسکول کھولیں جس میں ہونہار بچوں کو مفت میں تعلیم دی جا سکے انہوں نے بتایا کہ ہمیں بہت کامیابی حاصل ہوئی ہے اور بہت جلد ہم اپنے اس خواب کو پورا کریں گے،انہوں نے کہا کہ ڈاکٹر بھیم راؤ امبیڈکر نے کہا تھا کہ تعلیم شیرنی کا وہ دودھ ہے جو اس کو پیئے گا وہ دہاڑے گا انہوں نے کہا کہ ہمیں اپنے بچوں کو تعلیم یافتہ بنانا ہوگا تاکہ وہ ملک اور ملت کی خدمت کر سکیں.
پروگرام میں اصلاح معاشرہ پر ایک سیمینار بھی منعقد ہوا جس میں قاری ناصر صاحب و قاری عمران صاحب نے بچوں کو قرآن و سنت کے مطابق اپنی زندگی گزارنے ، نیک عمل کرنے اور سماج سے برائیوں کو دور کرنے کی تلقین کی.
یوم تاسیس کے اس پروگرام میں سبھاسد سہیل احمد ، شبو انصاری ، محمد ساریہ ، نوشاد احمد کے علاوہ صحافیان اور اساتذہ کو بھی اعزاز سے نوازا گیا۔
