لکھنٶ(پریس ریلیز/ابوشحمہ انصاری)اترپردیش کے سابق کارگزار وزیر اعلیٰ اور آل انڈیا مائنارٹیز فورم فار ڈیموکریسی کے قومی صدر ڈاکٹر عمار رضوی نے ریاستی حکومت سے پرزور مطالبہ کیا ہے کہ محمودآباد، ضلع سیتاپور میں واقع نیتاجی سبھاش چندر بوس کے نام سے موسوم اسپورٹس اسٹیڈیم کا نام فورا بحال رکھا جائے اور حالیہ طور پر اسے محض ’’اسپورٹس اسٹیڈیم‘‘ کہے جانے کے فیصلے کو واپس لیا جائے۔
ڈاکٹر عمار رضوی نے ریاستی وزیر، کھیل و یوتھ ویلفیئر، اترپردیش (آزادانہ چارج) گریش چندر یادو کے نام تحریر کردہ خط میں واضح کیا ہے کہ سن 1975 میں اُس وقت کے وزیر اعلیٰ آنجہانی ہیم وتی نندن بہوگُنا کے دورِ حکومت میں محمودآباد میں واقع ایک قدیم کھیل کے میدان کو باقاعدہ اسٹیڈیم کی منظوری دلائی گئی تھی۔ بعد ازاں جب پورے ملک میں نیتاجی سبھاش چندر بوس کے یومِ پیدائش کے صد سالہ جشن کا انعقاد ہوا تو ریاستی حکومت سے درخواست کر کے اس اسٹیڈیم کو نیتاجی سبھاش چندر بوس کے نام سے منسوب کرایا گیا، جس کی باضابطہ منظوری بھی دی گئی۔
انہوں نے مزید لکھا کہ اسی اسٹیڈیم کے سامنے عوامی تعمیرات محکمہ کے ذریعے ایک ڈاک بنگلہ کی تعمیر بھی کرائی گئی تھی، جو اس مقام کی تاریخی اور عوامی اہمیت کو مزید نمایاں کرتا ہے۔
ڈاکٹر عمار رضوی کے مطابق حال ہی میں یہ اطلاع ملی ہے کہ اس اسٹیڈیم کا نام بدل کر محض ’’اسپورٹس اسٹیڈیم‘‘ رکھ دیا گیا ہے، جو نہایت افسوسناک اور تشویشناک قدم ہے۔ ان کا کہنا ہے کہ جس مقام کو ملک کے عظیم مجاہدِ آزادی نیتاجی سبھاش چندر بوس کے نام سے موسوم کیا جا چکا ہو، وہاں سے ان کا نام ہٹا دینا کسی بھی صورت مناسب نہیں۔ یہ اقدام قومی وقار اور تاریخی شعور کے منافی ہے اور عوامی جذبات کو مجروح کرتا ہے۔
ڈاکٹر رضوی نے حکومتِ اترپردیش سے اپیل کی ہے کہ اس معاملے میں فوری مداخلت کرتے ہوئے محمودآباد، سیتاپور میں واقع اس اسٹیڈیم کو نیتاجی سبھاش چندر بوس کے نام پر ہی برقرار رکھا جائے۔ انہوں نے امید ظاہر کی کہ ریاستی حکومت عوامی احساسات اور تاریخی ذمہ داری کو ملحوظ رکھتے ہوئے جلد از جلد نام کی بحالی کا اعلان کرے گی۔
انہوں نے خط میں یہ بھی تحریر کیا ہے کہ اگر نیتاجی کے نام کی بحالی عمل میں آتی ہے تو وہ ذاتی طور پر بھی اور محمودآباد کی پوری عوام حکومت کی شکر گزار رہے گی۔ ان کا کہنا ہے کہ نیتاجی سبھاش چندر بوس کا نام محض ایک تختی نہیں بلکہ آنے والی نسلوں کے لیے تحریک اور قومی شعور کی علامت ہے، جسے مٹنے نہیں دیا جانا چاہیے۔یہ اطلاع آل انڈیا مائنارٹیز فورم فار ڈیموکریسی کے شعبۂ نشر و اشاعت کے سیکرٹری ابوشحمہ انصاری نے فراہم کی۔
