روورز رینجرز کے ذریعے محدود وسائل میں بہتر زندگی کا ہنر
لکھنؤ (پریس ریلیز/ابوشحمہ انصاری) فخرالدین علی احمد گورنمنٹ پی جی کالج میں آج تین روزہ روورز رینجرز تربیتی کیمپ کا باقاعدہ آغاز ہو گیا۔ اس تقریب کی صدارت گورنمنٹ پی جی کالج کی پرنسپل، ڈاکٹر سیما سنگھ نے کی۔ کیمپ میں روور انچارج ڈاکٹر اوپیندر سنگھ اور رینجرز میں خصوصی تعاون ڈاکٹر زیبہ خان نے فراہم کیا، جبکہ تربیت کار سنجے کشیپ اور کماری پوجا دیوی کی کامیاب رہنمائی میں پروگرام منعقد ہوا۔
کیمپ کے آغاز پر گورنمنٹ پی جی کالج میں پرچم کشائی کی گئی اور شرکاء کو زندگی کے مختلف حالات میں خود کو تیار رکھنے اور نظم و ضبط کی اہمیت سے آگاہ کیا گیا۔ کالج کی پرنسپل نے کیمپ کا افتتاح کرتے ہوئے اپنے خطاب میں کہا کہ اس تربیت کے ذریعے حاصل ہونے والی تعلیم زندگی بھر کام آئے گی اور محدود وسائل میں بہتر زندگی گزارنے کا ہنر روورز رینجرز کے ذریعے سیکھا جا سکتا ہے۔
اسی سلسلے میں شعبۂ معاشیات کے اسوسی ایٹ پروفیسر، محمد سعید نے روورز رینجرز کو مشکل حالات میں آسانی کے ساتھ زندگی گزارنے کے طریقوں سے روشناس کرایا۔ شعبۂ تاریخ کی پروفیسر، جیوتی شاہ، جو طویل عرصے تک رینجرز انچارج رہ چکی ہیں، نے بتایا کہ اس تربیت کے بعد نوجوان سماج کے ساتھ مل کر کئی فلاحی کام انجام دے سکتے ہیں۔
کیمپ کے پہلے سیشن میں ٹولی کی تشکیل، اس کی معلومات، روورز رینجرز کے نشانات، بائیں ہاتھ سے سیلوٹ کا اصول، پرچم باندھنے اور اس کے آداب پر روشنی ڈالی گئی، جبکہ دوسرے سیشن میں ادارے کا تعارف، تربیتی عملے کا تعارف، دعا، جھنڈا گیت، قواعد، حلف اور وردی سمیت مختلف پہلوؤں پر تفصیل سے گفتگو کی گئی۔
آخر میں روورز انچارج، ڈاکٹر اوپیندر سنگھ نے پرنسپل، تمام اساتذہ، ٹرینرز، شریک طلبہ و طالبات اور میڈیا سے وابستہ افراد کا شکریہ ادا کیا۔ اس موقع پر گورنمنٹ پی جی کالج کے سینئر پروفیسر ڈاکٹر وپن کمار شکلا، پروفیسر سنجیو کمار اگروال، پروفیسر انل وشِرانت، ڈاکٹر آر پی سنگھ سمیت تمام اساتذہ اور دیگر عملہ موجود رہا۔
