جمعیۃ علماء شہر کانپور کی جانب سے حسب سابق غرباء میں رضائی تقسیم کا سلسلہ شروع
کانپور (محمد عثمان قریشی) جمعیۃ علماء شہر کانپور کی جانب سے غریبوں اور ضرورت مندوں کی امداد کا سلسلہ بدستور جاری ہے، جس کا مقصد انسانیت کی خدمت اور معاشرے کے کمزور طبقے کی ضروریات کو پورا کرنا ہے۔ یہ سلسلہ جمعیۃ علماء اترپردیش کے سابق صدر اور کانپور کے سابق قاضی شہر مولانا محمد متین الحق اسامہ قاسمی رحمۃ اللہ علیہ کے زیر قیادت شروع ہوا تھا۔ مولانا کی رحلت کے بعد بھی یہ مشن ان کے وارثین نے بھرپور عزم کے ساتھ جاری رکھا ہوا ہے۔
اسی ضمن میں سرد موسم کو مدنظر رکھتے ہوئے ہر سال ضرورت مندوں میں گرم کپڑے اور دیگر سامان تقسیم کیا جاتا ہے۔ امسال بھی جامع مسجد اشرف آباد جاجمؤ کانپور میں ایک رضائی تقسیم پروگرام منعقد کیا گیا، جس میں جمعیۃ علماء اترپردیش کے نائب صدر اور جمعیۃ علماء شہر کانپور کے جنرل سکریٹری مولانا امین الحق عبداللہ قاسمی نے رضائی تقسیم کیں۔
اس موقع پر مولانا امین الحق عبداللہ قاسمی نے حاضرین سے خطاب کرتے ہوئے قرآن و حدیث کی روشنی میں غریبوں اور مسکینوں کی مدد کے حکم، فضیلت اور اس کے اجر و ثواب پر تفصیلی روشنی ڈالی۔ انہوں نے کہا کہ غریبوں کی مدد کرنا جمعیۃ علماء ہند کا اہم نصب العین ہے اور یہی عمل انسانیت کی اصل خدمت ہے۔ مولانا نے کہا کہ نے کہا کہ غریبوں کی مدد اللہ تعالیٰ کا محبوب عمل ہے اللہ تعالیٰ ان لوگوں کو پسند فرماتا ہے جو دوسروں کے دکھ درد میں شریک ہوتے ہیں۔ مولانا نے نبی کریم صلی اللہ علیہ وسلم کی حدیث خیر الناس من ینفع الناس کا ذکر کرتے ہوئے کہا کہ سماج کے کمزور طبقے کی مدد کرنا ایک اہم دینی فریضہ ہے۔
پروگرام میں بڑی تعداد میں ضرورت مند افراد موجود تھے، جنہوں نے جمعیۃ علماء کی جانب سے فراہم کی جانے والی مدد پر ان کا شکریہ ادا کیا۔ شرکاء نے اس اقدام کو نہ صرف مستحق افراد کی مدد بلکہ سماج میں ہمدردی اور بھائی چارے کو فروغ دینے کا ذریعہ بھی قرار دیا۔
مولانا قاسمی نے حاضرین کو تلقین کی کہ وہ بھی اس کار خیر میں شامل ہوں اور اپنی استطاعت کے مطابق غریبوں اور ضرورت مندوں کی مدد کریں۔ انہوں نے کہا کہ سردی کے موسم میں یہ مدد ان کے لیے زندگی آسان بنانے کا ذریعہ ہے۔ جمعیۃ علماء شہر کانپور کی یہ کوششیں مقامی سطح پر ضرورت مند افراد کے لیے ایک بڑی سہولت ہیں، اور یہ سلسلہ آگے بھی جاری رکھنے کا عزم کیا گیا ہے تاکہ معاشرے کے نادار طبقے کو ریلیف فراہم کیا جا سکے۔
اس موقع پر جامعہ کے استاذ مولانا محمد فریدالدین قاسمی، مفتی اظہار مکرم قاسمی،قاری عبدالمعید چودھری، حافظ شہباز محمودی، مولانا اسماعیل قاسمی، قاری بدرالزماں قریشی اور محفوظ عالم موجود رہے۔
