ڈاکٹر عمار رضوی کی رہائش گاہ پر تہنیتی ملاقات، باہمی رواداری کا اظہار
لکھنؤ: (پریس ریلیز/ابوشحمہ انصاری) عید الفطر کے پُرمسرت موقع پر آل انڈیا مائناریٹیز فورم فار ڈیموکریسی کے قومی صدر ڈاکٹر عمار رضوی کی رہائش گاہ پر منعقدہ تہنیتی ملاقات نے سماجی ہم آہنگی اور قومی یکجہتی کی ایک خوشگوار تصویر پیش کی۔ اس موقع پر مختلف سیاسی جماعتوں سے وابستہ سرکردہ رہنماؤں کی شرکت نے عید کی خوشیوں کو دوبالا کر دیا۔
تفصیلات کے مطابق سماج وادی پارٹی کے قومی صدر اکھلیش یادو، بھارتیہ جنتا پارٹی کی سینئر لیڈر و سابق مرکزی وزیر ریتا بہوگنا جوشی اور اتر پردیش حکومت کے وزیرِ خزانہ سریش کھنہ ڈاکٹر عمار رضوی کی رہائش گاہ پر پہنچے، جہاں انہوں نے عید کی پُرخلوص مبارکباد پیش کی اور نیک خواہشات کا اظہار کیا۔
اس موقع پر قائدین نے کہا کہ عید الفطر ہمیں محبت، اخوت اور رواداری کا درس دیتی ہے اور ایسے مواقع مختلف طبقات کے درمیان فاصلے کم کرنے اور دلوں کو جوڑنے کا ذریعہ بنتے ہیں۔ انہوں نے اس بات پر زور دیا کہ ملک میں امن و امان اور سماجی ہم آہنگی کو برقرار رکھنا ہم سب کی مشترکہ ذمہ داری ہے۔
ڈاکٹر عمار رضوی نے معزز مہمانوں کا خیرمقدم کرتے ہوئے ان کا شکریہ ادا کیا اور کہا کہ اس طرح کی ملاقاتیں باہمی اعتماد کو فروغ دیتی ہیں اور معاشرے میں مثبت پیغام عام کرتی ہیں۔ انہوں نے اس عزم کا اعادہ کیا کہ فورم سماجی انصاف، جمہوری اقدار اور قومی یکجہتی کے فروغ کے لیے اپنی کوششیں جاری رکھے گا۔
اس موقع پر متعدد سماجی و ادبی شخصیات بھی موجود رہیں، جنہوں نے عید کی خوشیوں میں شرکت کرتے ہوئے باہمی محبت، بھائی چارے اور سماجی ہم آہنگی کے پیغام کو عام کرنے کی ضرورت پر زور دیا۔
یہ تقریب اس حقیقت کی آئینہ دار بنی کہ اختلافِ رائے کے باوجود تہوار ایسے مواقع فراہم کرتے ہیں جہاں سب ایک دوسرے کے قریب آ کر محبت، بھائی چارے اور سماجی ہم آہنگی کو فروغ دیتے ہیں اور ایک مثبت و متحد معاشرے کی بنیاد مضبوط کرتے ہیں۔یہ اطلاع آل انڈیا مائناریٹیز فورم فار ڈیموکریسی کے شعبۂ نشر و اشاعت کے سیکریٹری ابوشحمہ انصاری نے فراہم کی۔
